QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraiymy Lazzat Ramazanova qaqtyǵystardy beibit jolmen sheshý protsesterine áielderdi belsendi tartýǵa shaqyrdy, dep habarlaidy "Ult aqparat".
Bul másele 2020 jylǵy 2 jeltoqsanda ótken BUU Qaýipsizdik keńesiniń 1325 qararyn júzege asyrý týraly Eýropadaǵy qaýipsizdik jáne yntymaqtastyq uiymynyń halyqaralyq dóńgelek ústeli otyrysynda kóterildi. Qarardyń máni – beibitshilik pen qaýipsizdikti nyǵaitý jónindegi is-sharalarǵa áielderdiń qatysýyn jan-jaqty qamtamasyz etý.
Lazzat Ramazanovanyń aitýynsha, «Áielder, beibitshilik jáne qaýipsizdik» taqyryby búgingi kún tártibinde óte ózekti másele. Sheshimin tappaǵan qaqtyǵystar sanynyń kóbeiýi, álemniń túpkir-túpkirinde bolyp jatqan shielenister, tabiǵi kataklizmderdiń artýy jáne COVID-19 pandemiiasy ábigerge túsirgeni anyq.
«Búginde barlyq elder, sonyń ishinde Qazaqstan, BUU Qaýipsizdik keńesiniń 1325 qararyn júzege asyrý boiynsha tiimdi jospardy múmkindiginshe tez arada qabyldaýy kerek. Beibit qurylysy protsesinde qaqtyǵystardy aldyn alý jáne sheshýge áielder belsendi túrde tartylý qajet», - dep atap ótti Lazzat Ramazanova.
Onyń aitýynsha, BUU Qaýipsizdik keńesiniń qararlary «Áielder, beibitshilik jáne qaýipsizdik» kún tártibi boiynsha birqatar máselelerdi retteýge múmkindik beretin normativtik-quqyqtyq bazany qurdy. Alaida, áielder resmi protsester men kelissózderge áli de az qatysady. Sondyqtan áielderdiń beibit kelissózder men kelisimderge tiimdi qatysýyn qamtamasyz etý jónindegi sharalardy kúsheitý, sondai-aq osy máselege qatysty sheshim qabyldaýdyń barlyq deńgeiinde áielderdiń kóptep qatysýyn qamtamasyz etý qajet.
L.Ramazanova qazirgi ýaqytta Qazaqstanda 2030 jylǵa deiingi Otbasylyq jáne genderlik saiasat tujyrymdamasy iske asyrylyp jatqanyn eske saldy. Tujyrymdama indikatorlarynyń qatarynda beibitshilik pen qaýipsizdikti qamtamasyz etýde áielderdiń úlesin arttyrýǵa qol jetkizý josparlanyp otyr. Qazirgi ýaqytta Tujyrymdamanyń 2020-2022 jyldarǵa arnalǵan ekinshi kezeńiniń is-sharalar jospary iske asyrylýda, onyń aiasynda «Áielder, beibitshilik jáne qaýipsizdik» bóliminiń is-sharalaryn ótkizý kózdelgen. Jaýapty organdar, atap aitqanda Qorǵanys ministrligi, Ishki ister ministrligi, Tótenshe jaǵdailar ministrligi jáne basqa da birqatar memlekettik organdar osy kún tártibi boiynsha BUU Qaýipsizdik keńesiniń qararlaryn tiimdi júzege asyrý úshin naqty is-sharalar ázirleýi qajet.
«Máseleniń máni - soǵysty áielder úshin «qaýipsiz» etý emes, soǵys pen qaqtyǵystar qaitalap oryn almaityn beibitshilik qurylym qurý. Qazaqstan áielderdiń beibit kelissózder ústelinde, sheshim qabyldaýǵa jáne bitimgershilik toptarǵa qatysýy úshin barlyq kúsh-jigerin salatyn bolady», - dep túiindedi komissiia tóraiymy.
Esterińizge sala keteiik, 1325 qararyn Birikken Ulttar Uiymynyń Qaýipsizdik keńesi 2000 jyly 31 qazanda qabyldaǵan bolatyn. Búgingi tańda 90-ǵa jýyq memleket áielder, beibitshilik jáne qaýipsizdik týraly kún tártibin júzege asyrý úshin ulttyq is-qimyl josparyn qabyldady.
