Qazaqstannyń isker áielderi qaýymdastyǵynyń basshysy Raýshan Sársembaeva Ulttyq qoǵamdyq senim keńesiniń tórtinshi otyrysynda áielderdi laýazymdy qyzmetke tartýǵa qatysty aitylǵan usynystarǵa pikir bildirdi, dep habarlaidy QazAqparat.
«Prezidenttiń korporativtik sektorda áielderdiń laýazymdyq ilgerileýi úshin 30 paiyz kólemindegi kvotany engizýge qatysty aitqany óte progressivti norma dep oilaimyn. Osy baǵyttaǵy usynys óte qajet jáne ony biz oń kózqaraspen qabyldadyq. Bul óz kezeginde kompaniialardyń direktorlar keńesinde názik jandardyń úlesin arttyrýǵa yqpal etedi. Qazir 5-7 paiyz shamasynda bolsa, endi 30 paiyzǵa deiin jetedi. Elimizdegi saýatty, parasatty áielderde direktorlar keńesiniń sheshimine yqpal etý, mańyzdy sheshimder qabyldaý múmkindigi bolady», - dedi R. Sársembaeva.
Onyń paiymynsha, ujymda áielder kóp bolsa, olar ómir sapasyn arttyrýǵa erekshe mán beredi.
«Osy arqyly Qazaqstanda barlyq qajetti qadamdar jasalyp jatqanyn ańǵarýǵa bolady. Sáikesinshe, bul sharalar genderlik teńdik reitingisine de áser etedi. Atalǵan 30 paiyzdyq úles az ýaqyttyń ishinde tiisti kórsetkishterdi arttyrýǵa múmkindik beredi. Osy oraida áiel adamdar sheshim qabyldaýǵa belsendi qatysady, názik jandardyń basym bóliginiń pikiri túrli áleýmettik jobalardy, zańnamany qabyldaýda nazarǵa alynady. Bul álemdik tájiribe jáne Memleket basshysynyń arqasynda Qazaqstan osy baǵytta saiasi kúsh-jigerin tanytyp otyr», - dedi Raýshan Sársembaeva.
Budan buryn habarlanǵandai, Ulttyq qoǵamdyq senim keńesiniń tórtinshi otyrysynda Prezident Qasym-Jomart Toqaev menshiginde memlekettiń úlesi bar kompaniialarda basshylyqtyń 30 paiyzy áielder bolýyn mindetteý qajettigi týraly Ulttyq keńes músheleriniń usynysyna nazar aýdardy.
«Biz bul bastamany birtindep júzege asyrý joldaryn qarastyrýymyz kerek dep oilaimyn. Mundai qadam áielderdiń biznes salasyna degen qyzyǵýshylyǵyn arttyrady», – dedi Memleket basshysy.
