Búgin elorda tórinde kúres túrlerinen ótip jatqan álem chempionatynyń tórtinshi kúni bozkilemge shyqqan balýan qyzdarymyzdyń úsheýi jartylai finalǵa ótti, dep habarlaidy QazAqparat.
Atap aitar bolsaq, 72 kelide beldesetin Jámila Baqbergenova ekinshi ainalymda túrkiialyq balýandy 10:0 esebimen jeńip, jartylai finalǵa joldama alsa, 55 kelide beldesetin Marina Sedneva polshalyq balýan Lýkasiakany 5:0 esebimen jeńip, jartylai finalǵa ótti. Sondai-aq, 50 keli salmaqta shirek finalda túrkiialyq Evin Demirhandy 12:2 esebimen jeńgen jerlesimiz Valentina Islamova jartylai finalǵa shyǵyp qana qoimai, Tokio Olimpiadasynyń joldamasyn qanjyǵasyna bailady.
Endi, Baqbergenova jartylai finalda Olimpiada chempiony, reseilik Natalia Vorobevamen kezdesse, Sedneva japoniialyq balýanmen kúsh synasady. Al Islamova jartylai finalda rýmyniialyq sportshymen final joldamasyn sarapqa salady.
Esterińizge sala keteiik, osyǵan deiin Valentina Islamova áielder kúresinen Olimpiadaǵa joldama jeńip alǵanyn jazǵan bolatynbyz.
