Foto: Mustafa Tileýhan
Qazaq avtorlyq kinosy taǵy bir jańa týyndymen tolyqty. Áiel taǵdyryna arnalǵan «Aqjeleń» kórkem filminiń túsirilim jumystary júrip jatyr.
Film Mádeniet jáne aqparat ministrliginiń tapsyrysy boiynsha jáne Ulttyq kinony qoldaý memlekettik ortalyǵynyń qoldaýymen «AR production» prodiýserlik ortalyǵynyń qatysýymen túsirilip jatyr.
Filmniń rejisseri – Bekzat Smadiiar bul týyndysynda tereń áleýmettik-psihologiialyq astarǵa qurylǵan, ulttyq bolmysty basty arqaý etken kino jasaýǵa talpynǵan.
Foto: Mustafa Tileýhan
Rejisserdiń aitýynsha:
«Aqjeleń» jobasynyń maqsaty – avtorlyq intellektýaldyq baǵyttaǵy, áleýmettik-psihologiialyq astary bar ulttyq film jasaý. Biz keiipkerlerdiń bolmysyn ashýda ulttyq mentaldyq qundylyqtar turǵysynan izdendik. Sondai-aq, siýjettik jelini qurastyrýda barlyq álem halyqtaryna túsinikti ortaq máselelerdi qamtýǵa tyrystyq. Sebebi, áiel taqyryby – adamzatqa ortaq taqyryp. "Aqjeleń» – dombyra kúilerinde qalyptasqan mektep. Áiel taǵdyryn, muń-sherin, qýanysh-qaiǵysyn arqaý etken kúiler osylai ataldy. Biz de qazirgi qazaq áielderiniń «aqjeleńin» shertkimiz keldi», – deidi rejisser Bekzat Smadiiar.
Filmniń bas keiipkeri – Jamaldyń rólin aktrisa Aqkenje Álimjan, al Rústemniń rólin Álihan Lepesbaev somdaidy. Operator – Erkinbek Pitiráliev, qoiýshy sýretshi – Sábit Qurmanbek.
«Aqjeleń» – áiel bolmysy men taǵdyry arqyly qoǵamdaǵy tereń áleýmettik qabattardy qozǵaityn film. Ulttyq dúnietanymdy jańasha qyrynan ashýǵa tyrysqan bul kartina – qazirgi qazaq áieliniń ishki álemin, onyń kúresin, úmiti men muńyn sýretteitin emotsionaldy ári estetikalyq dúnie.
Aita keteiik, filmniń túsirilim jumystary tolyq aiaqtalǵan soń, aldaǵy ýaqytta montaj jumystary jalǵasady.
