Búgin Nur Otan partiiasynyń sezinde Memleket basshysy kótergen jaittar men partiia qyzmetin odan ári jetildire túsýge qatysty QR Parlament Májilisiniń depýtaty Aidos Sarym pikirin ortaǵa saldy, dep habarlaidy "QazAqparat" HAA.
«Qańtar oqiǵasynan keiin Nur Otan partiiasynyń qyzmetin qaita qaraý mańyzdy bolyp otyr. Sońǵy ýaqytta elimizde naqty reforma júrgizýden góri, aýyzben reformalaǵyshtar kóbeiip ketti. Qarap otyrsań, jabý kerek, qurtý kerek, taratý kerek dep jatady. Biraq kez kelgen mekemeni jaýyp, ujymdy taratpas buryn onyń ornyna kim keledi jáne qandai nátije bermek degen jaǵyn oilaný qajet. Osy turǵyda Prezident búgin naqty ári salmaqty sheshimder usyndy. Ishinde syn da bar. Túpki maqsat – eldiń qamy, halyqtyń jaǵdaiyn jasaý. Árine, bizdiń elge saiasi reforma kerek», - dedi Aidos Sarym «QazAqparat» tilshisimen uialy telefon arqyly sóilesý barysynda.
Halyq qalaýlysynyń aitýynsha, memlekettik reformany júzege asyrýda baiyptylyq tanytqan abzal.
«Qańtar oqiǵasynan keiin halyqtyń Prezidentke degen senimi eselene tústi. Ózgeristi bári kútip otyr. Onyń aitýynsha, partiia bolsyn, basqasy bolsyn halyqqa qyzmet etý kerek. Bul tek Nur Otan-ǵa qatysty emes. Osy oraida Prezident týraly zańǵa ózgeris engizý kerek te shyǵar. Biz biletindei, Memleket basshysy qashan da óz atynan nemese halyq atynan sóileidi. Osy tusta Prezident jáne Nur Otan partiiasynyń basshysy laýazymynyń arajigin ashý kerek sekildi. Óz basym 4 birdei partiianyń qurylýyna qatysqan adammyn. Kez kelgen partiiany qurý 6 aiǵa deiingi ýaqytty alady. Bul ońai sharýa emes», - deidi ol.
Sondai-aq depýtat óńirlik máslihattardyń jumysyn jandandyrý kerektigin alǵa tartty.
«Jergilikti mańyzdy sheshimderdi qabyldaýda oblystyq, aýdandyq máslihattyń róli basym. Solardyń jumysyn ońtailandyrý qajet. Árine, keibir óńirde máslihattyń jumysy qyzý júrip jatyr, degenmen baiaý aimaqtar da bar. Jergilikti bilikke sózi ótpeitin máslihattyń bary jasyryn emes. Jaǵdai ár jerde ártúrli. Áńgime barysynda aita keteiin. Biz aldaǵy ýaqytta depýtattyq saýalǵa qaǵazben ǵana emes quzyrly organ basshysy ne ókili kelip, tikelei ózi jaýap berýin talap etkimiz keledi. Óitkeni hatpen jaýap berý men depýttardyń aldyna kelip jaýap berýdiń jóni bólek. Sonda formaldy jaýap berý bolmaidy», - dedi depýtat.
