QR Parlamenti Májilisiniń depýtaty Aidos Sarym «Jańa Qazaqstan» depýtattyq tobynyń qandai quqyqtary bolatyndyǵyn aitty, dep habarlaidy QazAqparat.
«Jalpy Parlamenttiń reglamenti men Konstitýtsiialyq zań boiynsha depýtattyq top tirkelgennen keiin Parlamenttik tyńdaý uiymdastyrýǵa, depýtattyq saýal joldaýǵa, kez kelgen úkimettik uiymnyń basshysyn shaqyrýǵa, esep alýǵa, qujattaryn suratýǵa qaqysy bar. Esterińizde bolsa, sońǵy shaqyrylymda depýtattyq toptar bolǵan joq. Bizdiń jumysymyz úi ishinen úi tigý emes. Eń aldymen Májilistiń, Parlamenttiń jumysyn barynsha jandandyrýymyz, áleýetin durys paidalanýymyz, ishki reformalardy júzege asyrýǵa kómektesýimiz kerek. Kóptegen baǵdarlamaǵa syn aityldy, aqiqat ta aityldy. Oǵan da bas-kóz bolý qajet. Oǵan da saiasi qoldaý kerek eken», - dedi Sarym elordada uiymdastyrǵan baspasóz máslihaty barysynda.
Aidos Sarym Qorǵas, ýtilalym, Almatydaǵy «Altyn orda» bazary syndy túitkildi máselelerdi baqylaýda ustaityndyqtaryn atap ótti.
«Bizdiń oiymyzsha, osynyń bárine tek atqarýshy bilik qana emes zań shyǵarýshy bilik te tikelei aralasyp, qadaǵalamasa, keibir máseleler qalyp qoiady, oryndalmaidy nemese uzaqqa sozylyp ketedi. Osy máselelerge BAQ-pen, saiasi kúshtermen qatar etene aralasyp, eldegi saiasi-ekonomikalyq jáne basqa da reformalar men jańǵyrtý úderisterin ilgerletý úshin eńbek etpekpiz», - dedi Aidos Sarym.
