Belgili saiasattanýshy Aidos Sarym elimizdegi partiialyq júie týraly pikir bildirdi, dep habarlaidy QazAqparat.
«Aldaǵy ýaqytta bolatyn eń úlken jańalyq - aimaqtaǵy máslihattardyń partiialyq júie boiynsha sailanatyny. Ras, qoǵamda ekiudai pikir bar. Qaitadan bir mandatty okrýgke qaitaiyq degen pikir aitylýda. Meniń oiymsha, qazir kózimizdi jumyp, partiialyq júiege ótýimiz kerek. Qazir máselen, Grýziiada búkil oppozitsiia bir ǵana nárseni - partiialyq júiege ótýdi surap otyr. Óitkeni, jeke mandatty organda saiasi oryndy satyp alý múmkindikteri kóp. Bir sheneýnik 600 mln dollar jumsap, halyqtyń nesiesin jaýyp, daýys jinap, óz partiiasynyń biligin saqtap qaldy. Ókinishke qarai, Grýziiadaǵy, Ýkrainadaǵy tranzit bir nárseni qamtamasyz ete almady. Biz osyny eskerýimiz kerek. Biz áli sovettik qalyptan shyqqan joqpyz», - dedi Aidos Sarym Prezidenttiń Qazaqstan halqyna Joldaýynyń alǵashqy nátijeleri týraly ǵylymi-praktikalyq konferentsiiada.
Sonymen birge, spiker Parlament, máslihat, qoǵamdyq uiymdar, partiialar syndy memleketke tirek bolatyn institýttardy qaita quryp shyǵý kerektigin aitty.
«Bizdiń basty mindet - osy sailaýdan keiin qoǵamnyń, saiasi júieniń, internettiń damyǵanyn paidalana otyryp, qoǵamdaǵy saiasi, ekonomikalyq sheshimderdi qabyldaityn azamattardyń sanyn kúrt ósirýimiz kerek. Basqa jolymyz joq. Bizdi óte qyzyq, bir jaǵynan daǵdarysty, ekinshi jaǵynan múmkindik beretin kezeń kútip tur dep esepteimin. Sondyqtan, qoǵam retinde aldaǵy sailaýda ideiany tańdaýymyz kerek. Pikir qozǵalystaryna, baǵyttarǵa múmkindik berý kerek», - dedi Aidos Sarym.
Aita keteiik, elordada Prezident Qasym-Jomart Toqaevtyń Qazaqstan halqyna Joldaýynyń alǵashqy nátijeleri talqylanyp jatyr. Oǵan memlekettik organdardyń, Qazaqstannyń ǵylymi-saraptamalyq qaýymdastyǵynyń 80-nen astam ókili qatysýda.
