بەلگٸلٸ ساياساتتانۋشى ايدوس سارىم ەلٸمٸزدەگٸ پارتييالىق جٷيە تۋرالى پٸكٸر بٸلدٸردٸ, دەپ حابارلايدى قازاقپارات.
«الداعى ۋاقىتتا بولاتىن ەڭ ٷلكەن جاڭالىق - ايماقتاعى مەسليحاتتاردىڭ پارتييالىق جٷيە بويىنشا سايلاناتىنى. راس, قوعامدا ەكٸۇداي پٸكٸر بار. قايتادان بٸر مانداتتى وكرۋگكە قايتايىق دەگەن پٸكٸر ايتىلۋدا. مەنٸڭ ويىمشا, قازٸر كٶزٸمٸزدٸ جۇمىپ, پارتييالىق جٷيەگە ٶتۋٸمٸز كەرەك. قازٸر مەسەلەن, گرۋزييادا بٷكٸل وپپوزيتسييا بٸر عانا نەرسەنٸ - پارتييالىق جٷيەگە ٶتۋدٸ سۇراپ وتىر. ٶيتكەنٸ, جەكە مانداتتى ورگاندا ساياسي ورىندى ساتىپ الۋ مٷمكٸندٸكتەرٸ كٶپ. بٸر شەنەۋنٸك 600 ملن دوللار جۇمساپ, حالىقتىڭ نەسيەسٸن جاۋىپ, داۋىس جيناپ, ٶز پارتيياسىنىڭ بيلٸگٸن ساقتاپ قالدى. ٶكٸنٸشكە قاراي, گرۋزيياداعى, ۋكرايناداعى ترانزيت بٸر نەرسەنٸ قامتاماسىز ەتە المادى. بٸز وسىنى ەسكەرۋٸمٸز كەرەك. بٸز ەلٸ سوۆەتتٸك قالىپتان شىققان جوقپىز», - دەدٸ ايدوس سارىم پرەزيدەنتتٸڭ قازاقستان حالقىنا جولداۋىنىڭ العاشقى نەتيجەلەرٸ تۋرالى عىلىمي-پراكتيكالىق كونفەرەنتسييادا.
سونىمەن بٸرگە, سپيكەر پارلامەنت, مەسليحات, قوعامدىق ۇيىمدار, پارتييالار سىندى مەملەكەتكە تٸرەك بولاتىن ينستيتۋتتاردى قايتا قۇرىپ شىعۋ كەرەكتٸگٸن ايتتى.
«بٸزدٸڭ باستى مٸندەت - وسى سايلاۋدان كەيٸن قوعامنىڭ, ساياسي جٷيەنٸڭ, ينتەرنەتتٸڭ دامىعانىن پايدالانا وتىرىپ, قوعامداعى ساياسي, ەكونوميكالىق شەشٸمدەردٸ قابىلدايتىن ازاماتتاردىڭ سانىن كٷرت ٶسٸرۋٸمٸز كەرەك. باسقا جولىمىز جوق. بٸزدٸ ٶتە قىزىق, بٸر جاعىنان داعدارىستى, ەكٸنشٸ جاعىنان مٷمكٸندٸك بەرەتٸن كەزەڭ كٷتٸپ تۇر دەپ ەسەپتەيمٸن. سوندىقتان, قوعام رەتٸندە الداعى سايلاۋدا يدەيانى تاڭداۋىمىز كەرەك. پٸكٸر قوزعالىستارىنا, باعىتتارعا مٷمكٸندٸك بەرۋ كەرەك», - دەدٸ ايدوس سارىم.
ايتا كەتەيٸك, ەلوردادا پرەزيدەنت قاسىم-جومارت توقاەۆتىڭ قازاقستان حالقىنا جولداۋىنىڭ العاشقى نەتيجەلەرٸ تالقىلانىپ جاتىر. وعان مەملەكەتتٸك ورگانداردىڭ, قازاقستاننىڭ عىلىمي-ساراپتامالىق قاۋىمداستىعىنىڭ 80-نەن استام ٶكٸلٸ قاتىسۋدا.
