Belgili saiasattanýshy, Ulttyq qoǵamdyq senim keńesiniń múshesi Aidos Sarym Qordaidaǵy qaiǵyly oqiǵaǵa qatysty pikir bildirdi, dep habarlaidy QazAqparat.
«Árine bul – qaitalanbaýy tiis óte qorqynyshty oqiǵa. Bul jait barlyǵyna sabaq bolýy kerek. Biz kúrdeli ýaqytta ómir súrip jatyrmyz. Bizdiń qoǵam únemi qozǵalysta jáne onda arhitektonikalyq ózgerister júrip jatyr. Bul álemde ózgermeitin, turaqty eshteńe joq. Sondyqtan ótken jyldardyń shań basqan lozýngtaryn búrkenbei, óz elimizdi, óz qoǵamymyzdy zertteýimiz kerek», - dedi Aidos Sarym.
Osyǵan bailanysty, ishki saiasat qurylymyn qaita reformalap, shielenistiń qaidan shyqqanyn zertteý qajet.
«Biz qolda bardyń bárinen bir mezette-aq ajyrap qalýymyz múmkin ekenin, buryn jasyryp kelgen dúnielerimizdiń báriniń bir sátte beti ashylyp, ózimiz kórgimiz kelmeitin dúnieniń kýási bolatynymyzdy baiqadyq.
Sondyqtan qazir mert bolǵandardy jerlep, jaralylardy emdep, eń bastysy – baiyppen oilaný qajet. Halyqtyq diplomatiia quraldaryn ǵana emes, gýmanitarlyq ǵylymdardy – áleýmettaný, psihologiia, konfliktologiiany qoldanyp, qaqtyǵystyń árbir minýtyn zertteý kerek. Assambleia institýttaryn qosa alǵanda, memlekettik organdar men ishki saiasat qurylymdaryn reformalaý qajet», - dedi A. Sarym.
Eske salaiyq, 7 aqpan kúni Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles boldy. QR Prezidenti Qasym-Jomart Toqaev buzaqylyq sipattaǵy jappai tóbelesti arandatýshylar óz paidasyna qoldanbaq bolǵanyn málimdedi.
