Aýyl sharýashylyǵy birinshi vitse-ministri Aidarbek Saparov agrarlyq tehnika qunynyń ósýine qatysty pikir bildirdi, dep habarlaidy QazAqparat.
«Agrarshylar tarypynan otandyq óndiristegi aýyl sharýashylyǵy tehnikasyna baǵanyń kúrt óskeni týraly shaǵymdar túsip jatyr. Qazirgi kezde osy tehinkanyń eleýli túrde qymbattaýy bolyp jatyr, onyń ishinde otandyq kásiporyndardyń ónimine de qatysty. 2022 jyldyń basynda otandyq zaýyttardan shyǵarylǵan aýyl sharýashylyǵy tehnikasynyń quny traktor men kombaindar boiynsha 2021 jylmen jylmen salystyrǵanda 13-ten 24 paiyzǵa deiin ósti», - dedi A. Saparov Senattaǵy dóńgelek ústel otyrysynda.
Osy oraida ol qazirgi ýaqytta tehnikany jetkizýshiler men óndirýshiler baǵany áli de ósirýi múmkin ekenin aitty.
«Aýyl sharýashylyǵy tehnikasynyń qymbattaýyna álemdegi ekonomikalyq ahýal áser etip otyrǵany túsinikti. Bul rette saýda jelesi tizbeginiń buzylýy, valiýtanyń qubylmalyǵy, jabdyqtar men bólshekterdiń qymbattaýy, sondai-aq kólik qyzmeti qunynyń ósýi yqpal etýde. Degenmen, otandyq óndiris tehnikasyna baǵanyń qadaǵalaýsyz ósýine jol berilmeýi tiis. Sonymen qatar, álemdegi sońǵy saiasi oqiǵalarǵa bailanysty Resei men Belarýstiń aldyńǵy qatarly óndirýshilerinen Qazaqstanǵa bólshekterdiń jetkizilýi tejelip tur. Sonymen qatar Resei men Belarýstiń aýmaǵy arqyly basqa elderden tranzitpen keletin tehnika men bólshekterdiń jetkizilýi qiyndady», - dedi vitse-ministr.
