Mádenietter men dinderdiń halyqaralyq ortalyǵynyń direktory Aidar Ábýov prezident Qasym-Jomart Toqaevtyń qatysýymen ótken Úkimettiń keńeitilgen otyrysynda buǵan deiin halyq arasynda sybyrlap aitylyp júrgen máselelerdi prezident dóp basyp aitty, degen pikir bildirdi.
«Memleket basshysy elimizdegi máselelerdiń bar ekenin aityp qana qoimai, ony qalai sheshý kerek, qalai jumys jasaý kerek, oǵan kimder jaýapty bolatynyna deiin naqtylap aitty. Sonyń biri «Bolashaq» baǵdarlamasy. Buǵan deiin bilim izdegen jastar ǵana emes, shendi-shekpendilerge deiin bilimin jetildirý maqsatynda osy baǵdarlamany paidalanatyn. Endigi jerde buǵan jol berilmeitindigi aityldy. Aýyl sharýashylyǵyna qatysty da, syrttan investorlar tartýda da jergilikti ákimderge talap qoidy. Sol investorlar arqyly elimizdegi ekonomikalyq máselelerdi sheshýge bolar edi. Alaida buǵan deiin bizdiń óńirlerdegi ákimderdiń ózderiń tym asqaq ustaýynan syrttan qarjy quiatyn investorlar sany azaiǵan. Sanamalap aita bastasaq sheshýin tappaǵan kúrdeli máseleler kóp eken. Keshe memleketke shyǵyn ákeletin jobalar, halyqtyń turmys deńgeiiniń tómendeýi, eldiń nesiegi táýeldiligin joiý, halyqty turǵyn úimen qamtý sekildi óte ózekti máseleler kóterildi», - deidi Aidar Ábýov.
Onyń aitýynsha endigi jerde bul máselelerdi halyq baqylaityn bolady. Sebebi, bilik pen halyqtyń arasy jaqyndady.
«Osy aitylǵan syn oń sheshilse halyqtyń turmysy jaqsarady, oryndalmai osy qalpynda qalatyn bolsa turmys tómendei beredi. Biraq, qazir bilik pen halyqtyń arasy aitarlyqtai jaqyndady. Bul máselelerdiń oryndalýyn halyq baqylaýynda ustaidy. Qazir áleýmettik jeli de barlyq másele ashyq talqylanady. Sondyqtan da memleket basshysy barlyq ákimderge áleýmettik jelilerge tirkelip, elmen tyǵyz bailanysta bolýdy buǵan deiin tapsyrǵan bolatyn», - deidi ol.
