Óskemendegi «Freshmarket» gastronomynyń aldynda ótken jármeńkede Aiagóz aýdanynyń 23 aýyldyq okrýginen kelgen sharýa qojalyqtary men jeke kásipkerleri óz ónimderin usyndy. Jármeńkeni oblys ákiminiń orynbasary Dúisenǵazy Mýsin aralap kórdi.
Bul kúni siyr men jylqy eti – 1100, qoi eti – 1000, kókónister 60 teńgeden saýdalandy. Jármeńkede Myńbulaq aýylynan kelgen «Bektas» sharýa qojalyǵynyń ónimderi lezde satylyp ketti. Bazar baǵasynan áldeqaida tómen baǵamen satylǵan ónimderdi jurtshylyq kezekke turyp, talasyp aldy.
Aýdandyq kásipkerlik jáne aýyl sharýashylyǵy bóliminiń basshysy Álibek Toqbaevtyń aitýynsha, jármeńkege jeti tonnadai et, 10 tonna kókónis, 12 tonna qaýyn-qarbyz ákelingen.
– Búgingi jármeńkede usynylyp otyrǵan azyq-túliktiń baǵasy 25-30 paiyzǵa arzan. Menińshe, bul shara birinshiden, aýyldaǵy jeke kásipkerler men sharýa qojalyqtarynyń áleýmettik-ekonomikalyq jaǵdaiyn jaqsartýǵa múmkindik beredi. Ekinshiden, qala turǵyndary úshin tiimdi, - deidi Álibek Toqbaev.
Sondai kásipkerlerdiń biri Baýyrjan Qusaqov asyltuqymdy mal sharýashylyǵymen ainalysady. Onyń aitýynsha, búginde ol 247 bas asyltuqymdy qunajyn satyp alǵan.
– Qazir 500 basqa arnalǵan mal bordaqylaý alańyn 1500 basqa arnap qaitadan jóndep jatyrmyz. Qazaqtyń aqbas siyrynyń sanyn kóbeitýdi qolǵa alǵanyma biraz ýaqyt boldy. Óitkeni, qazaqtyń aqbas siyry - TMD-da alǵash bolyp shyǵarylǵan arnaýly etti baǵyttaǵy iri qara tuqymy. Qazaq jáne qalmaq siyryn gereford tuqymymen shaǵylystyrý jolymen suryptap alynǵan, jergilikti jerdiń tabiǵi ózgeshelikteri men azyqtyq erekshelikterine ábden beiimdelgen, - deidi Baýyrjan Qusaqov.
Jármeńkede aiagózdikter múmkindigi shekteýli jandar men áleýmettik jaǵynan az qamtylǵan otbasylarǵa arnap qaiyrymdylyq dastarqanyn jaiyp, ulttyq ónimderdi tegin taratqanyn aita ketken jón.
– Aýdan basshylyǵyna analyq rizashylyǵymdy bildiremin. Nemerem – múgedek, 23 jasta. Oǵan «Úlbi» áleýmettik mekemesi qyzmet kórsetedi. Osyndai jármeńkede múmkindigi shekteýli balalardyń kóńilin aýlap, kórsetken qurmeti úshin uiymdastyrýshylarǵa alǵysymdy aitamyn. Búgin bizge segiz keli et pen sút ónimderi tegin berildi. Bul - biz úshin úlken kómek, -deidi Álima Qapataeva.
Ajar Saǵatbekova,
"Didar" gazeti
