Shyǵys Qazaqstan oblysy Aiagóz qalasyndaǵy arnaiy áleýmettik kómek ortalyǵynda kóptegen kemshilik bolǵan. Bul týraly búgin onlain formatynda ótken vedomstvoaralyq komissiia otyrysynda Qazaqstandaǵy adam quqyqtary jónindegi ýákil Elvira Ázimova aitty, dep habarlaidy QazAqparat.
Onyń atap ótýinshe, kúni keshe ǵana Ulttyq preventivti tetikterge qatysýshylar Shyǵys Qazaqstan oblysy Aiagóz qalasyndaǵy arnaiy áleýmettik kómek ortalyǵyn tekserýge baryp birqatar kemshilikti anyqtaǵan.
«Birinshiden, ortalyq 1985 jyly salynǵan burynǵy balabaqsha ǵimaratynda ornalasqan. Soǵan bailanysty tirek-qimyl apparaty buzylǵan balalarǵa qyzmet kórsetýge arnalmaǵan. 2007 jyly qosymsha turǵyn úi qurylysy salynǵan. Degenmen, ol da ortalyq qyzmetine beiimdelmegen. Aitalyq, tirek-qimyl apparaty buzylǵan balalarǵa asa qajetti bassein joq. Sport zaly jertólede ornalasqan jáne jaryǵy men aýa almasýy syn kótermeidi. Sport zaly eresekterge arnalǵan qural-jabdyqtarmen jabdyqtalǵan. Bul kishkentai balalardyń sportpen ainalysý múmkindikterinen aiyrady. Ortalyq tárbielenýshileriniń densaýlyqtaryn kútip ustaýyna septigin tigizetin sporttyq qural-jabdyqtar jetkiliksiz», - dedi ol.
Ýákildiń aitýynsha, ashana dálizde ornalasqan jáne kelip-ketýshiler tamaq iship otyrǵan balalardyń kóńilin aýdarady. Durys jabdyqtalǵan balalar oiyn alańy, pandýstar joq, ǵimaratta ekinshi qabatttan birinshi qabatqa túsetin lifti ornatylmaǵan. Tekserýshi organdardyń tarapynan baqylaý álsiz. Sebebi mekeme tym shalǵaida ornalasqan.
«Ulttyq preventivtik tetik qatysýshylarynyń paiymynsha, tárbie jumystary jetkiliksiz júrgiziledi. Balalardyń jas erekshelikterin eskeretin tárbielik sharalar sany óte az. Balalar quqyqtary buzylǵandyǵyn aitarlyqtai múmkindikteri joq. Olardyń quqyqtary qalai qorǵalatyndyǵy jáne olardyń keri bailanysty qalai alatyndyǵy túsinisiz. Tolyqtai alǵanda, Ulttyq preventivtik tetik qatysýshylary mekeme óz beiine sai kelmeidi degen qorytyndyǵa keldi», - dedi Elvira Ázimova.
Esterińizge sala ketsek, osyǵan deiin Aiagózdegi áleýmettik kómek ortalyǵynda 4 balanyń qaitys bolǵandyǵy habarlandy.
QR Ishki ister ministrligi istiń tergelýin óz baqylaýyna aldy. Osy oqiǵadan keiin QR Eńbek jáne halyqty áleýmettik qorǵaý ministrligi elimizdiń ár óńirinde ornalasqan meditsinalyq-áleýmettik kómek kórsetetin 113 mekemege tekserý júrgiziletinin málim etti. Onyń ishinde Aiagózdegi balalarǵa arnalǵan arnaiy áleýmettik kómek ortalyǵy bar.
