Shyǵys Qazaqstan oblysy Aiagóz qalasyndaǵy Balalarǵa arnaiy áleýmettik qyzmet kórsetý ortalyǵynyń tárbielenýshileri men qyzmetkerlerinen koronavirýs tabyldy, - dep habarlandy mekemeniń Instagram paraqshasynda.
Ortalyq direktory Sholpan Maqasheva 2 shildede qyzmetine kiriskenin habarlady. Sonymen qatar, ol 28 maýsymda mekemede tárbielenýshiler arasynda 2 koronavirýs juqtyrý oqiǵasy tirkelgenin aitty. Olar ortalyq syrtyna saparlap kelgennen keiin karantinde jatyr.
«Biri – ata-anasynyń janynda demalysta boldy, ekinshisi – Óskemen qalasyndaǵy psihikalyq densaýlyq ortalyǵynan keldi. Taldaý virýs bar ekenin anyqtaǵannan keiin balalar aýdandyq aýrýhanaǵa jiberilip, jazylyp shyqty. Qazir ortalyqtyń arnaiy oqshaýlanǵan bólmesinde jatyr. Koronavirýs anyqtalǵan soń ortalyq jetekshisiniń buiryǵymen 2 shildeden bastap karantin kúsheitildi. Jumyspen qamtýdy úilestirý jáne áleýmettik baǵdarlamalar basqarmasy qarjy bólip, barlyq tárbielenýshi men qyzmetkerler COVID-19-ǵa PTR-test tapsyrdy. Taldaý nátijesi 35 tárbielenýshi men 22 qyzmetkerdiń virýs juqtyrǵanyn kórsetti», - dep málimdedi Sh.Maqasheva.
Ortalyq direktorynyń málimeti boiynsha, qyzmetter men taýarlardyń sapasyn baqylaý komitetimen birlesip epidemiologiialyq tergeý júrip jatyr.
Boljam boiynsha, infektsiia mekemege karantinge deiingi ýaqytta taraǵan.
Balalardyń barlyǵyn meditsina qyzmetkerleri baqylap, dene qyzýyn, tynys alý jiiligin tekserip otyr.
Qazirgi kúni olardyń jaǵdaiy – birqalypty. Mamandar qalypty rejimde sabaq ótip jatyr.
