Aiagózdegi balalar ortalyǵynda júrgizgen tekserýdiń nátijeleri jariialandy, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
«Qazaqstandaǵy meditsinalyq-áleýmettik mekemelerde kórsetiletin qyzmetterdiń sapasyn jaqsartý maqsatynda jumys tásilderi ózgerýde. Onyń ishinde biylǵy jyldyń sáýir aiynda eldi dúrliktirgen oqiǵa oryn alǵan Aiagóz balalarǵa arnaiy áleýmettik qyzmetter kórsetý ortalyǵynda birqatar sharalar qabyldandy. MÁM jumysyn jaqsartý tetikteri, áleýmettik jumystyń basym baǵyttary vedomstvoaralyq keńestiń otyrysynda talqylandy. Eńbek jáne halyqty áleýmettik qorǵaý vitse-ministri Erlan Áýkenovtiń tóraǵalyǵymen ótken sharaǵa Shyǵys Qazaqstan oblysy ákiminiń orynbasary Álisher Marhabat, Prezident Ákimshiliginiń ókilderi, Májilis depýtattary, beiindi memlekettik jáne jergilikti atqarýshy organdardyń qyzmetkerleri, Bala quqyqtary jónindegi ombýdsmen, úkimettik emes uiymdardyń ókilderi qatysty», delingen habarlamada.
Kezdesý barysynda Prezident Ákimshiligi men Úkimet komissiialary Aiagóz ortalyǵynda júrgizgen tekserýdiń nátijeleri jariialandy. Tekserý nátijeleri ortalyqta arnaiy áleýmettik qyzmetterdi kórsetý standarttarynyń tolyq saqtalýy bóliginde birqatar zańbuzýshylyqtar bolǵanyn jáne de mekeme basshylyǵy tarapynan bul baǵytta tiisti baqylaý jasalmaǵanyn kórsetti.
Meditsinalyq saraptama balalar aýrýhanada negizgi jáne qatar júretin aýrýlardyń, sonyń ishinde aýyr týa bitken patologiialardyń saldarynan qaitys boldy degen qorytyndyny aiqyndady.
Shyǵys Qazaqstan oblysynyń Jumyspen qamtýdy úilestirý jáne áleýmettik baǵdarlamalar basqarmasynyń basshysy Jasulan Sársebaevtyń aitýynsha, ákimdik zańbuzýshylyqtardy joiý úshin shuǵyl sharalar qabyldaǵan.
«2 ǵimaratty jóndeýge, balalar alańdaryn abattandyrýǵa 139,5 mln teńge bólindi. Emdeý-deneshynyqtyrý úshin trenajer, kópfýnktsionaldy kereýetterdi satyp alýǵa, «bultty» saqtaýy bar beinekamera ornatýǵa qosymsha 46,9 mln teńge qosymsha qarastyrylǵan. Ortalyq qyzmetkerleriniń biliktiligin arttyrýǵa 3,5 mln teńge bólindi. Sonymen qatar, qazirgi ýaqytta ortalyqta taǵy bir turǵyn jai qurylysynyń jobalyq-smetalyq qujattamasy jasalýda. Jańa ǵimarat liftimen, palliativti top úshin uiyqtaityn bólme, meditsinalyq beket, oiyn bólmesi jáne ashanamen jabdyqtalady. Eski korpýsta alańdardy bosatýǵa bailanysty qosymsha kabinetter men zaldar (EDSh, sportzal jáne t.b.) ornalastyrylady», delingen habarlamada.
Sondai-aq, mekemede kadrlyq ózgerister boldy. Ortalyqta direktor men meditsinalyq bólimshe meńgerýshisi qyzmetinen bosatyldy. Direktor qyzmetine 20 jyldyq tájiribesi bar, buryn oblystyń bas pediatry qyzmetin atqarǵan pediatr dáriger Sholpan Maqasheva taǵaiyndaldy.
Shyǵys Qazaqstan oblysy ákimdiginiń Jumyspen qamtýdy úilestirý jáne áleýmettik baǵdarlamalar basqarmasy ortalyqpen jumys bóliminiń bastyǵy tártiptik jaýapkershilikke tartylyp, Aiagóz aýrýhanasynyń bas pediatryna qatań sógis jariialandy. Ortalyq quramynda gospital epidemiology shtaty ashyldy.
Eńbekmini Shyǵys Qazaqstan oblysy ákimdiginiń túitkildi máselelerdi sheshýge sapaly turǵyda kúsh salǵanyn atap ótti.
Eske sala ketsek, mamyr aiynda Shyǵys Qazaqstan oblysy Aiagóz qalasyndaǵy arnaiy áleýmettik kómek ortalyǵynyń 4 tárbielenýshisi kóz jumdy.
Osyǵan bailanysty QR Eńbek jáne halyqty áleýmettik qorǵaý ministrligi 113 meditsinalyq-áleýmettik mekemege jiti tekserý júrgizetinin jariialady. Onyń ishinde Aiagózdegi balalarǵa arnalǵan arnaiy áleýmettik kómek ortalyǵy bar.
