Shyǵys Qazaqstan oblysynyń ákimi Danial Axmetov sý tasqynyna ketken shyǵyndardy jariialady, dep xabarlaidy QazAqparat.
«Zyrian, Glýbokoe jáne Aiagóz aýdandarynda bolǵan sý tasqyny sońǵy 50 jylda alǵash ret bolyp otyr. Buqtyrma ózenindegi muzdyń qalyńdyǵy eki metrden asty. Ony jarýǵa biraz kúsh ketti. Sodan birneshe saǵattyń ishinde sýdyń deńgeii eki jarym metrge tómendedi. Ol Maleevka kentindegi jaǵdaiǵa qatysty. Aitpaqshy, muzdy jarýǵa 17 tonna trotildy jumsadyq. Onyń qanshalyqty kóp ekenin túsindirý úshin bir ǵana mysal keltireiin, tankterge qarsy minalarda 11 keli trotil bolady. Onymen 60 tonnadan asatyn temirdiń byt-shytyn shyǵarýǵa bolady», - dedi D.Axmetov jýrnalisterge bergen suxbatynda.
Oblys ákimi jarylǵysh zattardy qoldaný kezinde Semeide úi shynylarynyń synǵanyn da rastady. Búginde barlyq terezelerdi qalpyna keltirilgen.
Danial Axmetovtyń sózine qaraǵanda, búginde Shyǵys Qazaqstan oblysyna qosymsha 3,2 mlrd teńge kerek. Osyǵan bailanysty tiisti qujattar Úkimetke jiberildi. «Osy ýaqytqa deiin biz jergilikti biýdjetten shamamen 500 mln teńgeden astam qarjy jumsadyq. 172 úidi jóndep jatyrmyz. 34 úi jóndeýge kelmeidi. Qazir ony satyp aldyq. Sosyn 500 úidiń jobalyq-smetalyq qujattaryn ótkizdik», - de atap kórsetti D.Axmetov.
