Elimizde avtokólikti qaita tirkeý kezinde memlekettik nómirdi saqtaý protsesi avtomattandyryldy. Bul jaiynda QR Tsifrlyq damý, innovatsiia jáne aeroǵarysh ónerkásibi ministri Asqar Jumaǵaliev Facebook paraqshasynda jazdy, dep habarlaidy "Ult aqparat".
«Sizder tótenshe jaǵdai kezinde 4,5 myńnan astam azamattyń óz avtokóligin portal arqyly rásimdegenin estigen bolarsyzdar. Biraq rásimdei almaǵandary da bar. Sebebi, olar kóligin satqannan keiin, memlekettik nómirdi óz atynda saqtap qalǵylary keldi. Árine, bul - azamattardyń óz qalaýy. Keibirine tsifrlardyń kombinatsiiasy unaýy múmkin. Osy máseleni tsifrlyq komissarlar da kótergen edi. Tipti, bir azamattyń 362 nómirin óz atynda qaldyrǵysy keletini týraly maǵan hat jazǵany esimde. Ol turyp jatqan aimaqta bul san kieli sanalady eken jáne ony tumaryndai kórse kerek», - dep jazdy ministr.
Asqar Jumaǵaliev azamattardyń usynys-pikirlerin QR Ishki ister ministrligindegi áriptesterine jetkizgendigin atap ótedi.
«Olar «Ulttyq aqparattyq tehnologiialar» AQ-men birlesip, avtokólikti qaita tirkeý kezinde nómirdi saqtaý protsesin avtomattandyrdy. Buryn bul protsess mamandandyrylǵan HQKO-da qaǵaz túrinde júrgiziletin, azamattyń nómirdi óz atynda qaldyratyny týraly jazǵan ótinishin HQKO qyzmetkerleri IIM Ákimshilik politsiia komitetine joldap otyrdy. Keshe osy servisti testileýge qatystym. Búgin iske qostyq. Endi kóligińizdi portal arqyly esepten shyǵarý kezinde «memlekettik tirkeý nómirlik belgisin saqtaý» sóziniń janyna belgi qoisańyz boldy, memlekettik nómir ózińizde qalady», - dedi ol.
