Qazaqstan aýmaǵynan avtokólikpen munai ónimderin áketýge tyiym salý 6 aiǵa uzartylady. Bul týraly QR Energetika ministri Bolat Aqsholaqov aitty, dep habarlaidy QazAqparat.
«Memleket basshysynyń janar-jaǵarmai naryǵyn reformalaý jónindegi tapsyrmasy boiynsha mynadai is-sharalardy qabyldaý josparlanǵan. Birinshi - munai ónimderin óndirý jáne bólý salasynda ashyqtyqty jáne transparenttilikti qamtamasyz etý. Búgingi tańda munai jetkizýshiler munai ónimderin sońǵy satýshylar men kóterme saýda jetkizýshilerine satady. Bul rette kóterme saýda jetkizýshiler retinde menshik quqyǵynda munai bazalary bar tulǵalar ǵana emes, jaldaý quqyǵynda munai bazalary bar tulǵalar da áreket etedi. Osyǵan bailanysty, munai ónimderin ótkizý kezinde ónimsiz deldaldardy alyp tastaýdy kózdeitin túzetýler ázirlendi», - dedi ol ministrliktiń keńeitilgen alqa otyrysynda.
Ministrdiń aitýynsha, ekinshiden, «QazMunaiGaz» bazasynda 150 myń tonna kóleminde jáne «Qazaqstan temir joly» bazasynda 50 myń tonna kóleminde iri tutynýshylarda munai ónimderiniń rezervterin qurý kózdeledi.
«Úshinshi - Qazaqstan Respýblikasynyń aýmaǵynan avtomobil kóligimen munai ónimderin áketýge tyiym salýdy 6 aiǵa uzartý boiynsha buiryq qabyldaý. Tórtinshi - munai bazalaryn esepke alý-baqylaý aspaptarymen jaraqtandyrý», - dedi Bolat Aqsholaqov.
