Qaraǵandy oblysynyń ákimi kenshiler shaharyndaǵy dizel otynynyń tapshylyǵyna qatysty jaǵdaiǵa túsinik berdi, dep habarlaidy QazAqparat.
Qaraǵandy oblysynyń ákimi Jeńis Qasymbektiń aitýynsha, dizel otynynyń tapshylyǵyna bailanysty jaǵdai sheshilýde. Qoǵamdyq kólikti otynmen qamtamasyz etý basym tártippen júzege asyrylýda.
«Senbi kúni Úkimette osy másele boiynsha selektorlyq keńes ótkizildi. Óńirlerge janar-jaǵarmai belsendi jetkizilýde. Energetika ministrliginiń málimetinshe, jaqyn arada Pavlodar munai óńdeý zaýytynda jóndeý jumystary aiaqtalady. Demalys kúnderi avtoparkterge qosymsha dizel otyny keldi. Qoǵamdyq kólikterdi otynmen qol rejiminde qamtamasyz etý júrip jatyr», – dedi oblys basshysy onlain ótken apparat keńesinde.
Demalys kúnderi Qaraǵandyda qalalyq baǵyttarda júretin avtobýstardyń úshten bir bóligi jolǵa shyqpady. Bul jaǵdaiǵa janarmai quiý beketterinde dizel otynynyń bolmaýy sebep boldy.
