Bishkektegi avtobýstardyń birinde egde jastaǵy áiel men boijetken arasynda janjal shyǵyp, sońy tóbeleske ulasqan, dep habarlaidy ult.kz.
Áleýmettik jelide taraǵan aqparatqa sáikes, avtobýsqa mingen áiel boijetkennen ózine oryn berýin suraǵan. Qyz ótinishti oryndap, ornyn bosatyp bergen.
Alaida ájei otyrǵannan keiin jastardyń tárbiesi men úlkenge qurmet kórsetýi týraly sóz qozǵap, boijetkenge eskertý jasai bastaǵan. Buǵan qyz jaýap qaitaryp, ekeýiniń arasynda sózge kelispeýshilik týyndaǵan.
Keiin janjal ýshyǵyp, boijetken egde jastaǵy áielge qol kótergeni aitylady. Oqiǵaǵa bailanysty avtobýsqa politsiia shaqyrylǵan.
Taraǵan málimet boiynsha, taraptardyń biri aryz jazǵannan keiin boijetkendi tártip saqshylary alyp ketken.
Oqiǵanyń videosy áleýmettik jelide qyzý talqylanyp, qoldanýshylardyń pikiri ekige bólindi. Biri úlken kisige qol kóterýdi aiyptasa, endi biri qoǵamdyq kólikte beitanys adamdardyń bir-birine aqyl aitýyn orynsyz dep baǵalaǵan.
