Aqtóbedegi avtobýs órtinen aman qalǵan júrgizýshiler aýrýhanadan shyǵarylyp, tergeý izoliatoryna qamaldy, dep habarlaidy QazAqparat tilshisi oblystyq prokýratýranyń baspasóz qyzmetine silteme jasap.
«Aqtóbe oblysyndaǵy avtobýs órtine qatysty qylmystyq is IIM aimaqaralyq jedel tergeý tobynyń tergeý departamentine kelip tústi. Tergeý kezinde júrgizýshiler órt qaýipsizdigin saqtalmaǵany, kólik quraldaryn paidalaný zańdylyǵy eskerilmegeni jáne avtobýs ishinde jylytý shamy qoldanylǵany belgili boldy. Avtobýstyń úsh júrgizýshisi de osy qylmysqa qatysy bar ekeni anyqtaldy. Sondyqtan 24 qańtar kúni keshki saǵat 22:40-ta úsh júrgizýshi ustalyp, olar Aqtóbe qalasyndaǵy ýaqytsha tergeý izoliatoryna qamaldy. Olarǵa Qylmystyq kodekstiń 345-baby boiynsha aiyp taǵylyp otyr. Qylmystyq istiń zańdylyǵyn Ońtústik Qazaqstan jáne Aqtóbe oblystarynyń protsessýaldy prokýrorlary baqylaidy. Tergeý Bas prokýratýra men IIM baqylaýynda bolady», - dedi Aqtóbe oblysy prokýratýrasynyń apparat jetekshisi Jasulan Dáýlembaev.
Aita keteiik, 18 qańtar kúni Aqtóbe oblysynda avtobýs órtenip, 52 Ózbekstan azamaty qaza boldy. Al 5 adam aman qaldy. Onyń úsheýi Qazaqstan, ekeýi Ózbekstan azamaty. Eki Ózbekstan azamaty áli aýrýhanada jatyr. Olardyń densaýlyǵy jaqsy.
