Sýret: tafsilar.info
Resei diplomatynyń Grekiia azamattyǵyn alǵan ulyn Avstriia ishki ister ministrliginiń arnaýly qyzmeti Vena qalasynda ustaǵan. Memlekettik qaýipsizdik basqarmasy ony Reseidiń áskeri barlaýy úshin tyńshylyq jasady dep esepteidi. Ministrlik esebimen tanysqan Avtriia baspasózi Resei diplomatynyń uly bes jylǵa deiin sottalýy múmkin dep habarlady.
39-jastaǵy grek azamaty 24 naýryzda Vena shetindegi aýdandaǵy páterinde qamaýǵa alynǵan. "Asa qaýipti kúdiktini" arnaýly qyzmettiń eki toby jumyldyrylǵan. Onyń páterinen tyńdaǵysh qurylǵy detektory, qupiia kamera, minany zalalsyzdandyrý kezinde kietin saper kiimi tabylǵan, - deidi Kurier gazeti.
Vena tergeýshileri kúdikti aqparat jiberý úshin paidalanýy múmkin qupiia oryndardy tapqan. Sáýirde Avstriia Reseidiń Venadaǵy elshiliginiń úsh qyzmetkerin jáne Zaltsbýrgtegi konsýldyq qyzmetkerin elden shyǵaryp jibergen. Olardy diplomat jumysyna qatysy joq jumystarymen shuǵyldandy dep aiyptaǵan.
Kúdiktige Reseidiń Ýkrainaǵa basyp kirgenine Avstriianyń reaktsiiasy qandai bolatynyn bilý tapsyrylǵan bolýy múmkin. Kúdikti Resei Ýkrainaǵa basyp kirerden buryn, aqpanda Reseige baryp kelgen. Keiingi tórt jylda Máskeý, Minsk jáne Tbilisge 65 ret barǵan.
Tutqyndalǵan azamat túrli elderdiń barlaý qyzmetkerlerimen jáne diplomattarymen bailanys ornatqan. Onyń ákesi de Resei barlaýymen bailanysty bolýy múmkin. Ol Reseidiń Germaniia men Avstriiadaǵy diplomaty bolǵan.
"Vena halyqaralyq shpionaj ortalyǵy retinde tanymal" dep jazady Kronen Zeitung. Avstriia memlekettik qaýipsizdik basqarmasynyń esebinshe, Venada sheteldiń jeti myńnan astam agenti bolýy múmkin.
"Kúdikti Avstriiadan áleýmettik tólem alǵan" dep jazady Express. Sondai-aq, Resei men Grekiiadan jyljymaityn múlik satyp alǵan. Ol tergeýmen kelisimge kelýden bas tartqan, ózine taǵylǵan aiypty moiyndamaǵan jáne sotqa deiin bosatylǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
