Memleket Basshysy Qasym-Jomart Toqaev biylǵy halyqqa joldaýynda respýblikadaǵy aviabiletterdiń quny aspandap turǵanyn atap ótti. Qazirgi ýaqytta QR IIDM Azamattyq aviatsiia komiteti birqatar sharalardy qolǵa alyp, alǵa qoiylǵan maqsattarǵa jetý úshin tiisti is-sharalar josparyn ázirleýde, dep habarlaidy "Ult aqparat" ministrliktiń baspasóz qyzmetine silteme jasap.
Ministrlik aviabilettiń ózindik quny qandai kórsetkishterden quralatynyn aityp berdi. Baǵanyń edáýir bóligi aviaotynnyń qunynan shyǵady - bul shamamen 32%, sondai-aq áýe tehnikasyn paidalaný, áýe kemelerin jalǵa alǵany úshin tólemder jáne taǵy basqa eleýli shyǵyndardyń da úlesi barshylyq.
«Aviatsiialyq otynǵa qatysty aitarymyz, Qazaqstanda barlyq úsh MÓZ aiaqtalǵannan keiin, elimiz syrttan tasymaldanatyn kerosin importyna táýeldi bolmai qaldy. Bul otyn baǵasynyń 95 dollarǵa deiin tómendeýine birden áser etti. Budan ári Qazaqstan baǵany tómendetý, onyń ishinde sheteldik tasymaldaýshylar úshin QQS azaitý joldaryn izdestirýdi jalǵastyrýdy josparlap otyr» delingen habarlamada.
Komitetke Eýropa ishindegi ushýdy mysalǵa keltire otyryp, ishki reisterge aviabiletterdiń joǵary quny týraly suraqtar jii kelip túsýde. Alaida, Qazaqstannyń ishki naryǵyn EO-nan aitarlyqtai erekshelenetin birqatar faktorlar bar. Atap aitqanda, bul naryqtyń tyǵyzdyǵy, áýekompaniia oiynshylarynyń sany, Eýropada bizdiń elge qaraǵanda loýkosterler sanynyń edáýir artyq ekendigi, bul faktorlar salaýatty básekelestikke jáne aviabiletter qunynyń tómendeýine yqpal etedi.
«Biraq, aita ketý kerek, Qazaqstan qalalary arasynda úlken aýmaqtar men qashyqtyqtar bar jáne Eýropaǵa qaraǵanda halyqtyń tyǵyzdyǵy tómen. Sondyqtan, kilometraj boiynsha uqsas aviamarshrýttardy taldaý kezinde mynadai qorytyndy jasaýǵa bolady. Mysaly, Nur-Sultan-Almaty baǵyty boiynsha bilet quny 22 myń teńgeden bastalady. Parij-Rim Eýropadaǵy qashyqtyq boiynsha uqsas baǵyt, dollarlyq balamadaǵy bilet quny eki ese asady. Árine, EO-da ushý kezinde 30-40 minýttan aspaityn qysqa baǵyttar kóp, bul soǵan sáikes bilet baǵasyna da áser etedi» dep málimdedi ministrlik.
Osyǵan qaramastan, kóptegen kórsetkishter boiynsha, búginde Qazaqstanda aviaushýlar basqa eldermen, atap aitqanda Eýropa elderimen salystyrǵanda baǵa boiynsha básekege óte qabiletti.
