Almaty oblysynda janýarǵa jasalǵan qatygezdiktiń taǵy bir faktisi anyqtaldy. Taǵy bir júrgizýshi itti kólikke bailap súiregen, dep habarlaidy Sputnik Qazaqstan.
Oqiǵa Eńbekshiqazaq aýdanyndaǵy Báiterek aýylynda bolǵan. Jergilikti turǵyndardyń biri bul jaǵdaidy baiqap qalyp, sýretke túsirip alǵan. Keiinnen ol Instagram jelisinde jariialandy.
"Ittiń aýzynan aq kóbik aǵyp jatty. Aianyshty kórinis bolǵandyqtan, onyń jaǵdaiyna alańdadym. Júrgizýshiden suraǵanymda, ol itti osylaisha tasymaldap jatqanyn aitty", – dep jazady avtor.
Sýrette ittiń moinyndaǵy qarǵybaýynyń ekinshi ushy jeńil kóliktiń tóbesine bailanǵany kórinip tur.
Osy fakt boiynsha Eńbekshiqazaq aýdanyndaǵy Báiterek aýylynyń 52 jastaǵy turǵyny anyqtalyp, politsiia bólimine jetkizilgen.
"Qazirgi ýaqytta istiń mán-jaiy tekserilip jatyr. Mundai is-áreketke zańdy baǵa beriledi", – dep habarlady Almaty oblysynyń politsiia departamenti.
Birneshe kún buryn osyǵan uqsas oqiǵa Atyraýda boldy. Bul joly itti kóliktiń artyna bailap, asfalt betinde súiregen sátti kýágerlerdiń biri túsirip alǵan.
Sondai-aq, buǵan deiin Ekibastuz qalasynyń 72 jastaǵy turǵyny kóligimen itti jetekke alyp júrgen videosy jelide taraǵan. Keiinnen ol veterinarlyq aýrýhanadan shyqqan soń alabaidy kólikke sala almaǵanyn aityp aqtalǵan.
Al 2020 jyldyń jazynda áleýmettik jelide er adamnyń tońazytqysh esigimen itti tunshyqtyrǵan videosy paida boldy. Bul kórinis te qoǵamda qyzý talqylanǵan soń qylmystyq is qozǵalyp, biraq kóp uzamai toqtatyldy. Odan keiin Laki esimdi itti AQSh-tyń Kaliforniia shtatynan bir-aq shyqty.
Janýarlardy qorǵaýmen ainalysatyn qazaqstandyq belsendiler mundai qatygezdik úshin jazany qatańdatýdy birneshe ret kóterdi. Osy maqsatta 2020 jyldyń qazan aiynda elordada beibit miting te ótken.
Aita keteiik, qoldanystaǵy zańda janýarlardyń jaraqat alýyna nemese ólýine ákeletin kez-kelgen qatygezdik úshin kinálige 120 ailyq eseptik kórsetkish mólsherinde aiyppul salý (350 myń teńge) qarastyrylǵan. Sondai-aq, osy mólsherde túzetý jumysyna nemese 120 saǵatqa deiin qoǵamdyq jumystarǵa tartylady. Tipti, 30 táýlikke deiin qamaýǵa alýmen jazalanady.
