Elimizdiń aýyr atletika salasyndaǵy doping daýy Tokio Olimpidasynyń nátijesine áser etti me? Bul suraqqa aýyr atletikadan QR Memlekettik jattyqtyrýshysy Meńdihan Tápsiruly jaýap berdi, dep habarlaidy QazAqparat.
«Bizdiń aýyr atletter tóńiregindegi doping daýy Olimpiada nátijesine áser etti dep aita almaimyn. Osydan birneshe jyl burynǵy máseleni qozǵaý ádiletsiz bolyp, senimdi joǵaltar edi. Onyń ústine sońǵy jyldary bizdiń ziltemirshiler doping erejesin buzǵan emes. Jalpy Rio Olimpiadasynan keiin elimizdiń Aýyr atletika federatsiiasy dopingpen kúreste aitýly jumys atqaryp keledi. Iaǵni, sportshylarǵa doping tyiymy salynyp, qatań baqylaýǵa alyndy. Sondyqtan da 2016 jyldan beri doping faktisi tirkelgen emes jáne sportshylarymyz erejeni buzdy dep oilamaimyn», - dedi Meńdihan Tápsiruly OKQ-de onlain ótken baspasóz máslihatynda.
Sonymen qatar, memlekettik jattyqtyrýshy el namysyn qorǵaý maqsatynda shetelden legioner shaqyrýǵa qatysty pikir bildirdi.
«Jasyratyny joq, buryn syrttan sportshylar shaqyrdyq. Atap aitqanda, Resei, Ázerbaijan elinen orta jáne jeńil salmaqta sheteldik ziltemirshiler Qazaqstan namysyn qorǵaǵan bolatyn. Qazir óz atletterimiz jetkilikti. Shetelden sportshy shaqyrý maqsatymyz joq», - deidi ol.
