Tashkent qalasynda 17-25 sáýir aralyǵynda ótetin aýyr atletikadan Aziia chempionatyna baratyn Qazaqstan quramasy anyqtaldy, dep habarlaidy "Ult aqparat".
Qazaqstan aýyr atletika federatsiiasy málim etkenindei, litsenziialy bul týrnir aldaǵy Olimpiada oiyndaryna ranjirleý aiasynda qajetti reitingtik upaidy jinaýǵa múmkindik beredi.
Aziia birinshiliginde el namysyn 17 sportshy qorǵaidy:
Abylai Áýelhanov (55 kg)
Arli Chontei (55 kg)
Igor Son (61 kg)
Aleksei Drozdov (61 kg)
Sairamkez Aqmolda (67 kg)
Aleksandr Ývarov (81 kg)
Nurǵisa Ádiletuly (89 kg)
Artem Antropov (102 kg)
Rahat Bekbolat (102 kg)
Ibragim Bersanov (109 kg)
Zýlfiia Chinshanlo (55 kg)
Gúlnur Ybyrai (64 kg)
Ekaterina Bykova (71 kg)
Aisha Omarova (71 kg)
Karina Kýzganbaeva (81 kg)
Raýshan Meshithanova (87 kg)
Aizada Múptilda (87+ kg).
Qazaqstan ulttyq quramasynyń bas bapkeri Baqyt Ahmetovtiń aitýynsha, Aziia dodasyna daiyndyq josparǵa sáikes júrgizilýde.
«Qurama Tashkentke ushardyń aldynda Almaty oblysynda oqý-jattyǵý jiynynda sheberlikterin shyńdaidy. Sportshylar tizimine el birinshiliginde úzdik shyqqandar endi. Kóbiniń halyqaralyq jarystarda alǵan tájiribesi bar. Sonymen qatar qaraǵandylyq Aisha Omarova, Almaty oblysynan Aleksei Drozdov jáne shymkenttik Aleksandr Ývarov mundai dodada alǵash ret baq synamaqshy. Basty maqsat – biylǵy Olimpiadaǵa joldama alý», dedi B.Ahmetov.
Tokioǵa barýdan negizgi úmitkerler – áielder arasynan Zýlfiia Chinshanlo men Raýshan Meshithanova, erlerden Ibragim Bersanov pen Igor Son. Naqty kimniń baratyny maýsym aiynda biliktilik kezeńi aiaqtalǵannan keiin belgili bolady.
