Aýyr atletika federatsiiasy Albert Linderdiń qaitys bolýyna bailanysty tekserý júrgizetinin málimdedi.
"Keshe keshkisin aýyr atletikadan Qazaqstan Respýblikasy quramasynyń burynǵy músheleri, onyń ishinde qaza tapqan Albert Linderdiń aǵasy áleýmettik jelidegi paraqshalarynda qurama komandasynyń jattyqtyrýshylaryna shaǵym jáne syn aitty. Aýyr atletika federatsiiasy bul isti baqylaýǵa alýǵa jáne árbir aiyptaý boiynsha tekseris jasaýǵa nietti", - dep jazylǵan federatsiianyń saitynda.
Saittaǵy aqparatqa súiensek, jaqyn arada federatsiia árbir atletpen bailanysyp, ishki tergeý júrgizedi, onyń qorytyndysy týraly qosymsha habarlanady.
Esterińizge sala keteiik, 17 qyrkúiekte talantty sportshy, aýyr atlet Albert Linder ómirden ozǵany habarlandy.
Linder jasóspirimder arasyndaǵy álem chempiony jáne Aziia chempiony bolǵan. Ýniversiadada jeńimpaz atanyp qana qoimai, rekordqa da qol jetkizdi.
Qazaqstandyq aýyr atlet Ilia Ilin Instagram paraqshasynda sportshy Albert Linderdiń ólimine qatysty pikir bildirdi. Ilin kareradan keiin aýyr atletterdiń nazarsyz qalatyny sebep ekenin aitty.
"Sportshylardyń psihologiialyq jáne fizikalyq jaraqaty bolady. Ókinishke qarai, biz olarmen kúrese almaimyz. Bizde sport meditsinasy qalaǵanymyzdai emes. Sondyqtan da biz sportshylarymyzdan aiyrylyp jatyrmyz. Óitkeni karerany aiaqtaǵannan keiin biz eshkimge kerek emespiz. Jeńisten keiin úlken tájiribeni qaita bastaý kerek ekenin sezesiń. Al bul úrei týǵyzady", - dep atap ótti Ilin.
