Búgin Ortalyq kommýnikatsiialar qyzmetinde «Aýylym – altyn tuǵyrym» ádebi-onlain konkýrsynyń bastalýyna arnalǵan brifing ótti. Oǵan «Aýyl» partiiasynyń Tóraǵasy, QR Parlamenti Senatynyń depýtaty Áli Bektaev, baiqaýǵa tórelik etýshi qazylar alqasynyń tóraǵasy, belgili jazýshy Jabal Erǵaliev, QR Eńbek sińirgen qairatkeri, jazýshy-dramatýrg Roza Muqanova, ádebiettanýshy, f.ǵ.k., dotsent Larisa Haritonova, «Qazkontent» AQ basqarma tóraǵasynyń orynbasary Daniiar Áljanov qatysty.
«Aýylym – altyn tuǵyrym» ádebi-onlain konkýrsy «Aýyl» Halyqtyq-demokratiialyq patriottyq partiiasy men «Qazkontent» AQ «Ádebiet» portalynyń uiymdastyrýmen biyl úshinshi ret ótkizilip otyr. Qatysýǵa nietti qalamgerlerdiń shyǵarmalary jyl boiy adebiportal.kz portaly jáne auyl.kz. saitynda onlain túrde qabyldanbaq. Ár nominatsiiada úzdik shyǵarmalarǵa júldeli oryndar taǵaiyndalǵan. Proza, poeziia, dramatýrgiia janrlary boiynsha eń úzdik shyǵarma avtoryna dástúrli «Altyn tuǵyr» syilyǵy tapsyrylady.
Konkýrsqa qatysýshylardyń shyǵarmalaryn komissiia músheleri onlain rejiminde baǵalaidy. 2018 jylǵy «Aýylym – altyn tuǵyrym» ádebi-onlain konkýrsyna alǵash ret orys tildi qalamgerler de qatysýǵa múmkindik alyp otyr.
- «Aýyl – bir ulttyń sheńberimen shektelip qalmaidy. Ol barlyǵymyzǵa ortaq. Aýylda dúniege kelgen árbir azamat úshin bul kieli uǵym. Sondyqtan, aýyl taqyrybynda qalam tartyp júrgen orys tildi aqyndar, jazýshylar da konkýrstan shet qalmaýy kerek dep oilaimyn. Sondyqtan, jan-jaqty aqyldasa kele, biyl konkýrstyń aýqymyn keńeitip orys tilinde de shyǵarma qabyldaý jóninde sheshimge keldik», - dedi «Aýyl» partiiasynyń Tóraǵasy Áli Bektaev. Dástúrge ainalǵan konkýrstyń alǵashqy eki jylynda 532 shyǵarma qabyldandy. 2016 jyly kelip túsken barlyq shyǵarmalar toptastyrylyp, «Aýyl» partiiasynyń qoldaýymen «Altyn tuǵyr» degen ataýmen 3 tomdyq jinaq bolyp basylyp shyqty. Týyndylar jinaǵy «Aýyl» partiiasynyń aimaqtardaǵy filialdary arqyly kitaphanalarǵa taratyldy.
Biyl da 2017 jylǵy shyǵarmalar úsh janr boiynsha toptastyrylyp, oqyrman nazaryna usynylatyn bolady. Jinaqtyń tusaýkeseri aldaǵy maýsym aiynyń basynda keń kólemde ótkizilmek.
Brifing barysynda konkýrstyń sharttary tanystyrylyp, erejesi túsindirildi. Uiymdastyrýshylar men qazylar alqasynyń músheleri BAQ ókilderiniń konkýrsqa qatysty saýaldaryna jaýap berdi.
