Elordada «Aýylym – altyn tuǵyrym» atty respýblikalyq ádebi baiqaý qorytyndylandy, dep habarlaidy QazAqparat agenttigi.
Respýblikalyq baiqaý onlain formatta ótti jáne oǵan elimizdiń ár óńirinen 100-den astam qalamger qatysty.
Osymen besinshi jyl ótken ádebi saiys poeziia, proza jáne dramatýrgiia janry boiynsha uiymdastyryldy.
Odan bólek, «Balalarǵa arnalǵan eń úzdik ádebi shyǵarma» nominatsiiasy bar.
«Kelip túsken shyǵarmalardyń arqaýy – aýyl. Aýyldyń tirshiligi, aýyldaǵy aǵaiyndardyń ómiri qalamgerlerdiń eńbekterinen kórinis tapty. Osyǵan deiin qatysqan avtorlardyń shyǵarmalary 12 tomdyq jinaq bolyp shyqty. Biz olardyń aýyldyq jáne aýdandyq kitaphanalarǵa tegin taratyp kelemiz. Baiqaýǵa qatysamyn deýshilerge shek qoimadyq, onyń ishinde kásibi ádebietshiler de, qalam ustaýshy áýesqoilar da bar. Tek jas ereksheligi boiynsha shekteý qoiyldy. Iaǵni qatysýshynyń jasy 45-ten aspaýy tiis. Ondaǵy sebep halyq arasyndaǵy jas aqyn, jazýshylardy qoldaý jáne olardy aýyl taqyrybyna qarai burý. Nege aýyl? Sebebi bizdiń negizimiz, tilimiz, mádenietimiz aýylda. Maqsat – aýyl jáne onda tirshilik etip jatqan halyqtyń ómirin dáripteý», - dedi «Aýyl» partiiasynyń tóraǵasy, QR Parlamenti Senatynyń depýtaty Áli Bektaev.
Aita keteiik, shyǵarmashylyq baiqaý «Aýyl» partiiasynyń uiytqy bolýymen ótip otyr jáne qatysýshylardyń eńbegi jinaq bolyp shyǵady.
Uiymdastyrýshylar málim etkendei, ár janr boiynsha úzdik dep tanylǵan 1 oryn iesine 500 000 teńge, 2 oryn iesine 300 000 teńge jáne 3 oryndy ielengen jeńimpazǵa 200 000 teńge kóleminde syiaqy tabys etildi.
Sondai-aq, arnaiy júlde ielerine 100 000 teńge syiaqy berildi.
«Aýylym – altyn tuǵyrym» ádebi baiqaýynyń jeńimpazdary:
Bas júlde - Esbolat Aidabosynov (Sońǵy namaz)
Poeziia:
1 oryn - Arqalyq Ámáliiat;
2 oryn - Umtyl Zaqan;
3 oryn - Jarqyn Juparhan;
Qasym Amanjolov atyndaǵy arnaiy júlde - Jumatai Kóksýbai.
Proza:
1 oryn - Esbolat Aidabosynov;
2 oryn - Aizat Raqysheva;
3 oryn - Jantas Erkin;
Ábish Kekilbaev atyndaǵy arnaiy júlde - Qanat Ábilqaiyr.
Dramatýrgiia:
1 oryn - Yqylas Shalǵynbai;
2 oryn - Áskerhan Hýanbai;
3 oryn - Aqylbek Shaiahmet;
Qalihan Ysqaq atyndaǵy arnaiy júlde - Sádir Nurlan.
Sondai-aq, «Balalarǵa arnalǵan eń úzdik ádebi shyǵarma» nominatsiiasy boiynsha Aslan Tilegenov úzdik atandy.
