Dariǵa Nazarbaevanyń tóraǵalyǵymen ótken Senat otyrysynda senator D. Mýsin «Búgingi biýdjetti naqtylaý týraly zań jobasynyń basty ereksheligi – biýdjettik shyǵyndardyń basymdyqtaryn qaita qaraý arqyly, halyqty áleýmettik qoldaýdy kúsheitý bolyp tabylady», - dedi.
Otyrysta senatorlar 2019-2021 jyldarǵa arnalǵan biýdjetti naqtylaý týraly zań jobalaryn qarap, tolyqtyrýlar jasap, Májiliske qaitardy.
Talqylaý barysynda depýtattar Úkimet múshelerine suraqtar qoiyp, ózderiniń birqatar syn pikirlerin aitty.
«Aýyl – El besigi» arnaiy jobasyn iske asyrýǵa 2019-2021 jyldary 90 mlrd.teńge kóleminde qarjy bólý tapsyrylǵan.
Osy oraida senator D.Mýsin joba sheńberinde halyqtyń tyǵyzdyǵy, infraqurylymnyń jaǵdaiy, jańa jumys oryndaryn ashý múmkindigi mol 1781 eldi meken iriktelgenmen osy jobany iske asyrýǵa baǵyttalǵan uiymdastyrý sharalary jáne aimaqtyq standarttar júiesin ázirleý jumystarynyń búginge deiin aiaqtalmaǵanyn synǵa aldy.
«Bul kemshilikter jaqynda Parlament Májilisinde AÓK-in damytý boiynsha zań jobasyn talqylaý barysynda da aitylyp ótti. Búgingi kúngi «Aýyl – El besigi» atty arnaiy jobasy QR Prezidentiniń Jarlyǵymen bekitilgen «Aýyldyq aýmaqtardy damytýdyń 2004 – 2010 jyldarǵa arnalǵan memlekettik baǵdarlamanyń» ýaqyt talabyna sai jalǵasy retinde sanaýǵa bolady.
Sondai-aq, ótken jyly QR-ń AÓK-in damytýǵa jáne Óńirlerdi damytýǵa arnalǵan eki mańyzdy memlekettik baǵdarlamalar qabyldanǵany málim.
Osy oraida, atalǵan baǵdarlamalardyń sheńberindegi maqsattar men mindetterdiń oryndalýyna jaýapty memlekettik organdar biýdjetten baǵyttalyp otyrǵan qyrýar qarjyny eń aldymen «tirek» aýyldyq eldi mekender men damý áleýeti joǵary aýyldardyń infraqurylymdaryn damytýǵa tiimdi túrde igergenderi jón dep sanaimyn» , - dedi senator.
Sondai-aq, D.Mýsinniń aitýynsha, jalpy alǵanda, memleket tarapynan aýyldyq aýmaqtardy damytý boiynsha qabyldanǵan baǵdarlamalar jetkilikti, alaida olardy halyq igiligine iske asyrý boiynsha júieli jumystardy júrgizetin jaýapty jáne úilestirýshi naqty memlekettik organdy anyqtaý qajet.
«Sonymen qatar, agroónerkásiptik keshendi memlekettik qoldaýdyń barlyq sharalary jáne aýyldyq aýmaqtardy damytýdyń sektoraralyq baǵdarlamalaryn biriktirýdi kózdeitin «Aýyl – El besigi» atty arnaiy jobasyn júzege asyrýdyń biryńǵai saiasaty aiqyndalýy tiis dep oilaimyz.
Atalǵan shara aýyldyq aimaqtardy basqarýda vedomstvoaralyq bytyrańqylyqty eńserýge, sondai-aq, ortalyq jáne jergilikti atqarýshy organdar, úkimettik emes uiymdar men biznestiń arasyndaǵy úilesimdi kúsheitýge óz áserin tigizeri sózsiz»,- dedi senator D.Mýsin.
Ádilbek Qaba
