Aýyldyq jerlerdegi infraqurylym máselesin sheshý úshin 5 jyldyń ishinde 800 mlrd teńge bólinedi. Bul týraly Úkimet otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Aýyldyq jerlerdegi infraqurylym máselelerin sheshý úshin 5 jyldyń ishinde 800 mlrd teńge bólinedi. Bul óz kezeginde 3,5 myńnan astam aýyldaǵy 7 mln aýyl turǵyndarynyń ómir súrý sapasyn jaqsartýǵa múmkindik beredi. Jalpy aýyldyq jerlerdi damytýdyń keshendi tásili 2025 jylǵa qarai aýyl turǵyndarynyń ómir súrý sapasyn jáne ál-aýqatyn aitarlyqtai arttyrýǵa múmkindik ashady. Máselen, aýyl halqynyń sýmen qamtý qyzmeti 100 paiyz jetetin bolady», - dedi ministr.
Onyń atap ótýinshe, barlyq aýyl turǵyndary joǵary jyldamdyqty internetke qol jetkizedi. Jergilikti mańyzǵa ie joldardyń 95 paiyz jaqsy jaǵdaiǵa keltiriledi. 10 myń shaqyrym aýyl ishindegi joldar jóndeledi jáne salynady. Aýyldyq jerlerde 24 mln sharshy metr turǵyn úi paidalanýǵa beriledi. 110 myń jer ýchaskeleri jeke turǵyn qurylysy úshin qajetti infraqurylymmen qamtylady.
«Jalpy 12 myń shaqyrym injenerlik jeliler salynady jáne jańǵyrtylatyn bolady. Agroónerkásip kesheninde 845 investitsiialyq jobany iske asyrý aýyldarda 500 myń jańa jumys ornyn qurýǵa múmkindik beredi», - dedi Áset Erǵaliev.
