Ekinshi semestrden bastap Qazaqstandaǵy tehnikalyq jáne kásiptik kolledjderde oqý protsesi dástúrli, qashyqtan jáne aralas formatta jalǵasady, dep habarlaidy QazAqparat.
«Aýyldy jerlerde jáne shaǵyn qalalarda ornalasqan 97 kolledj óz stýdentteri úshin oqýdy dástúrli formatta uiymdastyrady. Sondai-aq QR IIM men QR QM janyndaǵy 14 kolledjdiń stýdentteri oqý oryndarynda oqidy. Qalǵan kolledjderde birinshi kýrs stýdentteri úshin, atap aitsaq stýdentteriniń jalpy sanynyń shamamen 31%-y úshin oqytý aralas formatta uiymdastyrylady», - dedi Bilim jáne ǵylym vitse-ministri Sholpan Karinova OKQ-da ótken baspasóz máslihatynda.
Onyń aitýynsha birinshi kýrs stýdentteri úshin barlyq sanitarlyq-epidemiologiialyq talaptardy saqtai otyryp, oqytý pánderiniń 70%-y dástúrli formatta jáne 30%-y qashyqtan ótkiziledi. TjKB uiymy oqý jumys josparlaryna sáikes shtattyq jáne qashyqtan oqytý formattarynda oqytýdy ótkizý úshin pánder tizbesin derbes aiqyndaidy.
«Aýditoriialyq sabaqtardyń uzaqtyǵy 45 minýttan aspaidy, kolledj ákimshiligi ikemdi keste qurady. Kabinetterde úzilister arasynda jáne sabaqtan soń sanitarlyq tazalaý jumystary júrgiziledi. 2-4 kýrs stýdentteri aralas formatta oqidy. Tehnikalyq, tehnologiialyq, agrarlyq baǵyttar boiynsha oqityn stýdentter úshin sabaqtar qashyqtan, zerthanalyq jáne praktikalyq sabaqtar, óndiristik oqytý jáne kásiptik praktika dástúrli formatta uiymdastyrylatyn bolady. Qorytyndy attestattaý da shtattyq rejimde ótedi», - dedi ol.
