«Qazaqstannyń isker áielder qaýymdastyǵy» respýblikalyq qoǵamdyq birlestiginiń prezidenti, QR Prezidenti janyndaǵy Áielder isi jáne otbasy-demografiialyq saiasat ulttyq komissiiasynyń múshesi Raýshan Sársembaeva qazaqstandyq áielderdiń zorlyq-zombylyqqa kózqarasy týraly zertteý nátijesin aitty, dep habarlaidy QazAqparat.
«Biz zorlyq-zombylyqsyz Qazaqstan» aktsiiasyn qoldaimyz. Bul jóninde birqatar sharalar atqardyq. Búginde Qazaqstanda 9,7 mln áiel turady, bul - halyqtyń 52%. Olar ultymyzdyń ál-aýqatyna eleýli úles qosyp keledi. Sonymen birge, áielderdiń ómirine tónetin syn-qaterler kóp. BUU derekterine sáikes, 2018 jyly árbir úshinshi qylmys áielderge qarsy jasalǵan», - dedi Raýshan Sársembaeva Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, qazaqstandyq áielderdiń 15% kúieýi áielin urýǵa quqyly dep sanaidy. Al aýyldaǵy árbir besinshi áiel zorlyq-zombylyqty qalypty jaǵdai dep esepteidi.
«Elimizdegi áielderdiń bul jaǵdaiy azamattyq qoǵamdy qatty alańdatady. Osyǵan bailanysty áielderdiń quqyqtary men múmkindikterin keńeitý úshin iri áielder uiymdary birigip, qyrkúiek aiynda Qazaqstannyń áiel kúshteri aliansyn qurdy. Onda áielderdiń múmkindikterin arttyratyn naqty maqsattar qoiyldy. Eń aldymen, olarǵa tiisýdiń jolyn kesý, harassmentpen kúres jáne turmystyq zorlyq-zombylyq qylmysynyń jazasyn kúsheitý kerek», - dedi R. Sársembaeva.
