Parlament Májilisiniń depýtattary biznes-ahýaldy jaqsartý máseleleri boiynsha jańa zań jobasyn talqylaý kezinde úi telefony qyzmetinen sýbsidiialaýdy alyp tastaý týraly normaǵa qarsylyq bildirdi, dep habarlaidy QazAqparat.
Aita ketsek Parlament Májilisiniń jalpy otyrysynda Ulttyq ekonomika ministri Rýslan Dálenov Qazaqstandaǵy biznes-ahýaldy jaqsartý máseleleri boiynsha jańa zań jobasyn tanystyrǵan bolatyn.
Zań jobasyna qatysty depýtat Aizada Qurmanova óz oiyn ortaǵa saldy.
«Zań jobasynda aýyldy eldimekender boiynsha ámbebap qyzmetterdi sýbsidiialaýdy alyp tastaý usynylǵan. Bul degenimiz – kádimgi úi telefondary. Bul norma aýyl turǵyndaryn birden-bir bailanys quralynan ajyratqaly otyr. Sol sebepti Májilis depýtattary ámbebap qyzmetterdi sýbsidiialaýdy saqtaǵan durys dep oilaimyz. Buǵan qatysty ne aitar edińiz», - degen májilismen bul norma jónnide Tsifrlyq damý, innovatsiialar jáne aeroǵarysh ónerkásibi ministri Asqar Jumaǵalievtyń oiyn surady.
Asqar Jumaǵaliev depýtattardyń bul eskertpesine durys qaraitynyn jetkizdi. Onyń aitýynsha 2004 jyly qolǵa alynǵan jumystardyń arqasynda Qazaqstandaǵy aýyldardyń kóbi telefon bailanysymen qamtamasyz etilgen.
«Biz dál osy sýbsidiia júiesimen aldaǵy ýaqytta aýyldarǵa internet tartýdy kózdeimiz. Sol sebepti osy sýbsidiianyń saqtalǵany durys. Aýyldaǵy halyqqa telefon da, internet te qoljetimdi bolýy kerek», - dedi ol.
Atalmysh máselege qatysty Májilis Tóraǵasy Nurlan Nyǵmatýlin depýtattardyń bul usynysyn qoldaitynyn jetkizdi.
«Shynyn aitý kerek, qazir aýylda ǵana emes, qalalardyń ózinde internet bailanysy nashar. Ony jaqynda bárimiz de kórdik. Sondyqtan jasyratyny joq búgin kóptegen aýylda bir ǵana sapaly bailanys – ol telefon. Qazirgi ýaqytta oǵan aiyna 670 teńge tólenedi. Eger bul tarif 2-3 ese óser bolsa halyq ony qalai tóleidi. Nege ony oilamaisyzdar?» - dedi Májilis Tóraǵasy.
Nurlan Nyǵmatýlin «Qazaqtelekom» kompaniiasymen zańnyń bul normasyna qatysty anyqtama alynǵanyn jetkizdi. Kompaniia bul norma kúshine enip ketse, 630 myń abonent boiynsha telefon tarifi ósetinin habarlaǵan.
«Bul aýyldaǵy abonentterdiń – 98 paiyzy. Álbette mundai jaǵdaida monopolist tarifti kóteredi. Artynsha tutynýshy telefon úshin burynǵydan kóbirek aqsha tóleýge májbúr bolady. Iaǵni, 670 teńgelik tarif 2-3 ese ósip ketedi degen sóz. Bul norma aýyldaǵy turǵyndardy jalǵyz bailanys quralynan aiyrady. Sebebi olarda kommýnikatsiianyń balamaly túri joq», - dep tolyqtyrdy N.Nyǵmatýlin.
Bul máselege qatysty Úkimet basshysynyń orynbasary – Qarjy ministri Álihan Smaiylov aýyldaǵy telefon bailanysy úshin tólem qymbattamaiynyn, sebebi respýblikalyq biýdjettiń esebinen bul baǵytta aldaǵy úsh jylda 8,5 mlrd teńge qarastyrylǵanyn jetkizdi.
«Aýyldar úshin telefon qyzmeti tarifiniń qymbattaýyna jol berilmeidi. Sýbsidiialaý shemasy burynǵysha qala beredi. Jeke memlekettik organdar zań jobasyn maquldaý kezinde aýyldyq eldimekender boiynsha bailanys naryǵyndaǵy básekelestikti damytý úshin usynystaryn bergen. Sol kezde bul norma zań jobasyna «baiqaýsyzda» kirip ketken sekildi. Daý týdyratyn norma ekenin sezip, zań jobasynan alyp tastaý kerektigin usynamyz», - dedi ol.
