Aýyldardaǵy meditsinalyq qyzmet kórsetýdiń qazirgi jaǵdaiy múshkil. Bul týraly «Aýyl» halyqtyq-demokratiialyq patriottyq partiiasy ortalyq apparatynyń jetekshisi Qýanysh Seiitjanov aitty, dep habarlaidy "Ult aqparat".
«Bir aidyń ishinde «Aýyl» partiiasynyń óńirlerdegi volonterleri, belsendileri aýyldyq jerdegi meditsinalyq qyzmettiń sapasyna erikti túrde montoring júrgizgen edi. Sonyń nátijesinde 200-ge jýyq aýyldyń qazirgi epidemiologiialyq jaǵdaida meditsinalyq qyzmet kórsetý barysymen tolyq tanystyq. Árine, aýyldardaǵy meditsinalyq qyzmet kórsetýdiń qazirgi jaǵdaiy asa máz emes, múshkil dep aitsaq ta bolady. Óitkeni, ózderińiz bilesizder, 90-shy jyldardaǵy ońtailandyrý tusynda kóptegen aýyldaǵy emhanalar, ambýlatoriialar, feldsherlik pýnkter jabylyp qalǵan edi. Feldsherlik pýnkter, aýrýhanalar jabylǵanymen naýqastar sany óspese, kemigen emes», - deidi ol.
Onyń aitýynsha, koronavirýs indeti tarap, epidemiologiialyq jaǵdaidyń ýshyǵyp turǵan tusynda aýyl turǵyndarynyń dárigerlerdiń qyzmetine júginý máselesi úlken problemaǵa ainalyp otyr. Mundai jait barlyq óńirge tán desek te bolady.
«Bul júieli problemaǵa ainalyp otyr. Bizdiń partiialyq bastamamyzdyń negizgi maqsaty da - osy problemalardy joiýǵa sep bolý. Qazir meditsina salasyna bólinetin memlekettiń biýdjeti jetkilikti. Odan bólek, Meditsinalyq áleýmettik saqtandyrý qorynda da qanshama qarjy bar. Sonyń esebinen feldsherlik pýnktiler, aýrýhanalar, ambýlatoriialar jabylyp qalǵan aýyldarda olardy qaita ashqyzýǵa qozǵaý salmaqpyz. Biz bul máseleni qandai deńgeide bolmasyn kóterip, jalpy aýyldardaǵy meditsinalyq qyzmet sapasyn qalpyna keltirý ne bolmasa jaqsartý úshin qyzmet ete beremiz», - deidi partiia ókili.
Partiianyń apparat jetekshisi málimetinshe, monitoring barysynda Jambyl, Qaraǵandy oblystarynda, jalpy basqa da óńirlerde de 3-4 aýylǵa bir feldsherlik pýnkt qyzmet kórsetetini anyqtalǵan.
«Al ol feldsherdiń aýyldardy aralap shyǵatyn deni durys kóligi de joq. Ne bolmasa turǵyn sany 2-3 myńnan asatyn aýyldar bir ǵana feldsherdiń qyzmetine júginip otyr. Tipti dárigerdiń qyzmetin kórmeitin aýyl turǵyndary da bar. Munyń bári memleket boiynsha úlken máselege ainalyp otyr. Koronavirýs indeti kezinde osy máselelerdiń óte ózekti ekendigin ańǵardyq», - deidi Qýanysh Seiitjanov.
