«Agrarlyq sektordy odan ári damytý úshin sheshýdi qajet etetin birqatar mańyzdy mindetter de bar. Naqty aitsaq, biyl elimizdiń keibir óńirlerinde bolǵan qýańshylyq jaiylymdyq jerler men jem-shóp daiyndaýǵa qatysty biraz máseleniń basyn ashyp berdi. Jem-shóp óndirisi aýyl sharýashylyǵynyń mańyzdy baǵyttarynyń biri. Biylǵy tapshylyqqa aýa-raiymen qatar jem-shóp daqyldaryna arnalǵan alqaptardyń jetkiliksiz bolýy da óz áserin tigizdi. Bul rette, qurǵaqshylyqqa tózimdi agrodaqyldardy ósirýdi yntalandyrýǵa baǵyttalǵan keshendi is-sharalardy qolǵa alý kerektigin mamandar kóterýde», - dedi M. Áshimbaev Senatta «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Onyń aitýynsha, usaq sharýashylyqtardy, onyń ishinde jeke qosalqy sharýashylyq kooperatsiialaryn damytý atalǵan máselelerdi sheshýde mańyzdy ról atqarady. Osy rette Memleket basshysynyń tapsyrmasyna sáikes jeke qosalqy sharýashylyq mártebesi men olarǵa kórsetiletin memlekettik qoldaýdy aiqyndaityn jáne usaq taýar óndirýshilerdiń kooperatsiiasyn damytýǵa arnalǵan tiisti zań jobasyn ázirleýdiń mańyzy zor.
«Sonymen qatar veterinariia salasyn jetildirý de asa mańyzdy. Bul máseleni senatorlar dáiekti túrde kóterýde. Infektsiialyq aýrýlardyń turaqty órshýi bul salada júieli sipattaǵy problemalar bar ekenin kórsetip otyr. Ol máselelerdi sheshý tamaq ónimderiniń qaýipsizdik dárejesine jáne mal ónimderin eksporttaýǵa da tikelei áser etetini anyq. Sondyqtan Úkimet veterinariia máselelerine erekshe nazar aýdaryp, olardy eńserý úshin tiisti sharalar qabyldaýy qajet», - dedi Senat tóraǵasy.
«Aýyl sharýashylyǵyn qarjylandyrý júiesin jetildirý de mańyzdy máselelerdiń biri. Qazirgi qoldanystaǵy sýbsidiialaý júiesinde birqatar máseleler bar. Memleket basshysy qyrkúiek aiyndaǵy Joldaýynda osy taqyrypqa erekshe nazar aýdarǵanyn jaqsy bilesizder. Sondyqtan tiisti ministrlik pen «Báiterek» holdingi salany sýbsidiialaý jónindegi qoldanystaǵy normativtik quqyqtyq aktilerge taldaý jasap, oryn alǵan olqylyqtar men kemshilikterdi joiý jóninde naqty usynystar ázirleýi qajet. Bul saladaǵy taǵy bir ózekti másele - azyq-túlik taýarlaryna ádil baǵa belgileý bolyp otyr. Ónimniń keibir sanattary boiynsha importtyń úlesi aitarlyqtai kóp ekeni jasyryn emes. Sondai-aq, aýyl sharýashylyǵy ónimderin óndirýshiden tutynýshyǵa deiingi jolǵa deldaldar ornyǵyp alǵan. Osy sebepti atalǵan ónimderdiń baǵasy aitarlyqtai ósip otyr. Osy baǵytta Memleket basshysynyń tapsyrmasy boiynsha kóterme-taratý ortalyqtarynyń jelisin damytý – ózekti maqsattardyń biri», - dedi Máýlen Áshimbaev.
