Aýyl sharýashylyǵy taýarlaryn ónidirýshilerden tiisti nátije bolatyndai mehanizmdi daiarlaý kerek.
Bul týraly agroónerkásiptik keshen sýbektilerin qarjylandyrý máselesin talqylaý kezinde Parlament Májilisi tóraǵasynyń orynbasary Vladimir Bojko málim etti, dep habarlaidy QazAqparat.
«Usynylǵan materialdarǵa toqtalsaq, ótken jyly «QazAgro» holdingi bólgen 400 mlrd teńge somasyndaǵy qarjylandyrý teńdessiz ósim bolyp otyr, iaǵni asa qomaqty deńgeidegi qarjylandyrý baiqaldy. Osy oraida Aýyl sharýashylyǵy ministrliginiń burynǵy basshysy Ómirzaq Shókeev (qazirgi Túrkistan oblysynyń ákimi Ó. Shókeev) salany qarjylandyrýdy aitarlyqtai kóbeitýge kúsh-jigerin saldy. Alaida bul qarjy somasy áli de jetkiliksiz bolýda. Resei aýyl sharýashylyǵyn 10 paiyzǵa, Belarýs resmi túrde 18 paiyzǵa qarjylandyrýda, al biz aýyl sharýashylyǵy IJÓ-sinen 4,5 paiyz deńgeiinde turmyz», - dep toqtaldy V. Bojko Parlament Májilisindegi dóńgelek ústel otyrysynda.
Osy oraida ol saladaǵy negizgi problemalarǵa toqtala kele, birinshi másele tiimdi qarjylandyrýdyń jetkiliksiz bolýyna qatysty bolsa, ekinshiden, aýyl sharýashylyǵy taýarlaryn óndirýshiler qyzmetindegi tiimsizdik keri tartyp turǵanyn atap ótti.
Óz kezeginde QR Aýyl sharýashylyǵy vitse-ministri Rústem Qurmanov búginde túrli sebeptermen bankter salany qarjylandyrýdy qysqartyp jatqanyn rastady.
«Men osyǵan deiin aitqan edim, biz 10 jyl boiy gektarynan ortasha eseppen 12 tsentner astyq shyǵymdylyǵyn ustap turmyz. Osy ýaqyt ishinde gektarynan 12 tsentner deńgeiimen qandai ekonomika bolady? Atalǵan ýaqyt aralyǵynda janar-jaǵarmai qymbattady. Energetikanyń túngi tarifin alyp tastady. Iaǵni barlyq baǵyttar boiynsha qymbattaý bolǵanymen, aýyl sharýashylyǵy óndirisinde eńbek ónimdiligi men tiimdilik baǵytynda turaqty ósim baiqalmady», - dedi Májilis tóraǵasynyń orynbasary.
