Aýyl sharýashylyǵy tehnikasy eki ese qymbattady. Bul týraly sharýalardyń máselelerin baiandaǵan «Atameken» UKP Agroónerkásip kesheni komitetiniń tóraǵasy Jigýli Dairabaev málimdedi, dep habarlaidy QazAqparat.
«Otandyq aýyl sharýashylyǵy tehnikalaryn jasaýdy durys qolǵa alýymyz kerek. Táýelsiz el bolǵanymyzǵa 30 jyldan asty. Barlyq iri kombaindar men aýyr tehnikalardy Qazaqstanǵa jinap alyp, ózimizde shyǵaraiyq deýden aýlaqpyz. Degenmen de, qarapaiym soqa, dán sepkish, tyrma siiaqty tehnikany ózimizde 6-7 zaýytta jasaýǵa bolady ǵoi. Endi tehnikanyń baǵasyn aitaiyn. K-730 degen úlken traktor bar. Ony otandyq dep aitaiyn. Óitkeni, ony alyp kelip, Qazaqstanda jinaimyz. Byltyr ol traktor 46 mln turatyn. Al, biyl onyń quny 92 mln teńge boldy. 2 ese qymbattady. Máselen, Acros, Vector degen kombaindar bar. Byltyr olar 50-55 mln bolatyn. Biyl 114 mln-ǵa deiin qymbattap ketti», - dedi Jigýli Dairabaev.
Sonymen qatar kásipkerler palatasynyń ókili aýyldarǵa jastardy tartý máselesin kóterdi. Onyń aitýynsha, oqý bitirgen jas maman aýylǵa barǵysy kelmeidi. Al, eldi mekenderdegi qalany azyq-túlikpen qamatamasyz etip otyrǵan kásiporyndarda jumys kúshi jetispeidi. Suranys joǵary. Tiisinshe, dúken sórelerindegi taýardyń baǵasy ósedi. Agroónerkásip kesheni komitetiniń tóraǵasy aýyldardan jastar údere kóship, keiingi jyldary elimizde 1 300-den astam aýyl jabylyp qalǵanyna nazar aýdardy.
