Senator Murat Baqtiiaruly agrarlyq sala eńbekkerlerin qarjylai qoldaýdy kúsheitý úshin Qazaqstanda aýyl sharýashylyǵy bankin qurýdy usyndy. Ol bul týraly elimizdiń Premer-Ministri Álihan Smaiylovtyń atyna depýtattyq saýalynda aitty, dep habarlaidy QazAqparat.
Depýtattyń pikirinshe, ol qazirgi tańda asa qajet salaǵa aitarlyqtai qoldaý kórseter edi.
Bul másele jaqynda senatorlardyń Qyzylorda oblysyna barǵan jumys sapary kezinde kóterilgen bolatyn. Diqandar aimaqtaǵy negizgi agrarlyq daqyly kúrish ekenin aita kelip, osy daqyl oblysta ishki naryq suranysynyń 80%-na deiin qamtamasyz etetinine toqtaldy. Alaida jyl ótken saiyn jumys isteý qiyndai túsýde. Óńirdegi sýarmaly jerlerdiń jaǵdaiy óte nashar, sýarmaly jerlerde sý qubyry men káriz júiesi tiisti qarjylandyrýdyń joqtyǵynan ýaqytynda tazartylmaidy. Bul qubyrlardyń qoqysqa tolyp ketýi men shamadan tys tuzdanýǵa ákeledi.
«Damyǵyn elderde 1 tekshe metr sýǵa 4-6 keli aýyl sharýashylyǵy ónimi óndirilse, bizde nebári 0,4-0,8 keli, iaǵni 6 ese az óndiriledi. Al damyǵan elderde 1 keli ónim óndirýge 160-400 litr sý jumsalsa, bizde 1200-2500 litr sý jumsalady. Demek, elimizdegi sýarmaly jerlerdiń gidromeliorativtik ahýaly qanaǵattanarlyqsyz jaǵdaida. Bul Úkimet tarapynan nazar aýdararlyq másele», - dedi depýtat.
Onyń aitýynsha, mineraldy tyńaitqyshtardyń qymbattyǵy da bólek bir problema. Biyl olardyń baǵasy ótken jylmen salystyrǵanda 2,5-3 ese ósti. Bul salada deldaldar mańyzdy ról atqarady, sonyń saldarynan ónimniń quny edáýir ósip ketedi.
Depýtat osyǵan bailanysty óz saýalynda «Melioratsiia týraly» zańdy qabyldaý qajettigin atap ótti. Ol zańda memlekettik organdar men jer paidalanýshylardyń jerdi melioratsiialaý jónindegi jaýapkershiligi naqtylanýy tiis.
Sonymen qatar senator elimizde aýyl sharýashylyǵy bankin ashý qajettigine de nazar aýdardy.
«Bizdiń aýyl sharýashylyǵy óndirýshileri Evraziialyq ekonomikalyq odaqqa engen Resei, Belarýs elderiniń aýyl sharýashylyǵy taýarlaryn óndirýshilerimen básekege túse almai otyr. Óitkeni, bul elderdiń sharýalarynyń jeri men múlkin kepildikke alyp, uzaq merzimge arzan nesie beretin, bólimsheleri barlyq aýdandarda ornalasqan agrobankteri qyzmet etedi. Osy kezge deiin Parlament qabyrǵasynda birneshe ret kóterilip, biraq sheshimin tappai jatqan bizdiń elimizde de osyndai arnaiy mamandandyrylǵan aýyl sharýashylyǵy bankin ashý máselesin qarap, onyń oń sheshilýin búkil sharýalar kútip otyrǵanyna nazaryńyzdy aýdarǵymyz keledi», - dedi M. Baqtiiaruly.
