Daǵdarys jaǵdaiyna bailanysty jumyrtqa óndirýshilerdi qoldaý týraly sheshim qabyldandy, dep habarlaidy Aýyl sharýashylyǵy ministrliginiń baspasóz qyzmeti.
«Agroónerkásiptik keshendi damytý» memlekettik baǵdarlamasynda 2020 jyldan bastap jumyrtqaǵa taýarlyq sýbsidiiany alyp tastaý qarastyrylǵan. Sýbsidiiany alyp tastaý týraly norma 2017 jyly memlekettik baǵdarlama qabyldanǵan sátte qus fabrikalary basshylary men qus óndirýshilerdiń salalyq qaýymdastyǵymen kelisilgen bolatyn.
Alaida, COVID 19 virýsynyń taralýynan týyndaǵan daǵdarysqa bailanysty 2020 jyly jumyrtqanyń ózindik quny kúrt ósti. Osyǵan bailanysty QR Aýyl sharýashylyǵy ministrligi jumyrtqa óndirýshilerdi qoldaýdy jáne ónimniń birligine sýbsidiialaý normasyn 3 ten 1,5 teńgege deiin tómendete otyryp, «azyq-túlik jumyrtqasyn óndirýdi sýbsidiialaý» baǵytyn saqtaýdy usyndy.
«Qus ósirýshilerdi qoldaý jáne sáikesinshe jumyrtqanyń ózindik qunyn tómendetýge QR Úkimeti 5 mlrd teńge bólýdi josparlap otyr» delingen habarlamada.
Sonymen qatar, Úkimet jumyrtqa óndirýshilerge «Qarapaiym zattar ekonomikasy» baǵdarlamasy arqyly ainalym qarajatyn tolyqtyrý úshin jeńildetilgen qarjy alý múmkindigin berdi. Bul qus fabrikalary qiyn kezeńde ózin jemmen qamtamasyz ete alýy úshin jasaldy.
Sonymen qatar, aýyl sharýashylyǵy taýar óndirýshilerine asyl tuqymdy qus satyp alýǵa sýbsidiia túrinde jáne eksporttyq ónimdi tasymaldaý shyǵyndaryna qosymsha qoldaý kórsetiledi.
Esterińizge salsaq, Qazaqstanda jumyrtqa óndiretinin 31 qus fabrikasy bar. Boljam boiynsha olar jylyna 5,5 mlrd jumyrtqa óndiredi.
Sonymen birge, otandyq óndiris qazaqstandyq naryqtyń 100%-dan astam qajettiligin qamtamasyz etedi. Demek, qus fabrikalarynyń artyq ónimdi shetelge satý múmkindigi bar.
2019 jyly respýblikanyń qus fabrikalary 527 mln dana jumyrtqany eksporttady. 2020 jylǵy qańtar-aqpan ailarynda eksport kólemi - 1542 tonna (30,8 mln dana).
