Aýyl sharýashylyǵy ministri Saparhan Omarov qoimalardaǵy azyq-túlik qory týraly aityp berdi, dep habarlaidy QazAqparat.
«Búginde Qazaqstanda azyq-túlik jetkilikti, iaǵni jaǵdai turaqty. Qazirgi kezde saýda jelileri men qoimalarda ónimniń qajetti deńgeiinde bolýyna qatysty kún saiyn monitoring júrgizýdemiz. Eger de keibir taýarlar jetispese, jetkizemiz. Mysaly, Mańǵystaý oblysynda qandai da bir kólemde taýar qajet bolsa, biz ony jedel túrde jetkizemiz», - dedi ministr Parlament Májilisinde tilshiler saýalyna jaýap bere otyryp.
Onyń sózine qaraǵanda, qazirgi elimizdegi qoimalardy azyq-túlikpen tolyqtyrý jumystary jalǵastyrýda.
«Qazaqstanda óndiriletin azyq-túlik ónimderi elimizge bir jylǵa jetedi. Qazir qoimalardaǵy kólem 5-6 aiǵa jetedi. Sonymen birge, búginde óndirister jumystaryn jalǵastyryp jatqanyn umytpaý kerek. Toqtaýsyz jumys istep turǵan kásiporyndar taýarlar kólemin únemi tolyqtyryp turady», - dedi Saparhan Omarov.
Budan buryn habarlanǵandai, Aýyl sharýashylyǵy ministri negizgi azyq-túlik taýarlarynyń 29 túri boiynsha turaqty túrde monitoring júrgizilip jatqanyn aitty.
