Elordada «Aýyl» partiiasy men «Qazaqstan fermerleri qaýymdastyǵy» yntymaqtastyq memorandýmyn bekitti, dep habarlaidy QazAqparat.
Qujatqa «Aýyl» Halyqtyq-demokratiialyq patriottyq partiiasynyń tóraǵasy Áli Bektaev pen «Qazaqstan fermerleri qaýymdastyǵy» respýblikalyq qoǵamdyq birlestiginiń basqarma tóraǵasy Jigýli Dairabaev qol qoidy.
Memorandým aiasynda taraptar agroónerkásip keshenin damytýǵa, aýyl sharýashylyǵy salasy men aýyl eńbekkerleriniń ózekti máselelerin sheshýge, aýyl sharýashylyǵy taýar óndirýshileri men agroónerkásiptik keshenniń basqa da qatysýshylaryna memlekettik jáne memlekettik emes qoldaý júiesin jetildirýge járdemdesýge baǵyttalǵan birlesken is-sharalardy ótkizý týraly kelisimge keldi.
«Qazaqstan fermerleri qaýymdastyǵy» - Qazaqstannyń barlyq oblystarynyń 40 myńnan astam fermerin biriktiretin iri qoǵamdyq uiymdardyń biri. Atalmysh qoǵamdyq birlestikpen ortaq múddelerimiz kóp. Buǵan deiin de respýblikalyq jáne aimaqtyq deńgeide áriptestik qarym-qatynasta boldyq. Ásirese aýyl sharýashylyǵy salasynyń damýyna qatysty máselelerde qaýymdastyq pen partiianyń ustanǵan baǵytynyń ortaq ekenine kóz jetkizdik. Búgingi yntymaqtastyq memorandýmy arqyly «Aýyl partiiasynyń» áleýeti artyp, aýyl sharýashylyǵynyń damýyna qosar úlesimiz eselene túsedi dep úmittenemin», - dedi «Aýyl» partiiasynyń tóraǵasy Áli Bektaev «Agrarlyq salany damytý – ortaq múddemiz» atty birlesken otyrysta.
Onyń aitýynsha, álemdi jailaǵan koronavirýs indeti agrarlyq sektordyń, azyq-túlik qaýipsizdiginiń mańyzdylyǵyn aiqyndap berdi.
«Dál qazir adamǵa qymbat kóliktiń de, qymbat kiimniń de keregi joq. Eń negizgisi – denniń saýlyǵy. Eldi etpen de, sútpen de, nanmen de qamtamasyz etip otyrǵan sol aýyldyń berekeli tirligi, eren eńbegi. Otyz jyldyń ishinde ekonomikamyzdyń shikizatqa táýeldilik qursaýynan shyǵa almai qalǵany jasyryn emes. Basqasyn aitpaǵanda, Qazaqstannyń aýylsharýashylyq óndiris keshenin damytýǵa áleýeti jetkilikti. Mal baǵyp, jer emgen ata kásibimizdi qaita jańǵyrtyp, óńdeý ónerkásibin dereý jandandyrýymyz qajet», - dedi partiia tóraǵasy.
Óz kezeginde «Qazaqstan fermerleri qaýymdastyǵy» RBK basqarma tóraǵasy Jigýli Dairabaev: «Búginde elimizdegi árbir aýdanda fermerler qaýymdastyǵy jumys isteidi. Negizgi maqsatymyz – aýyl áleýetin kóterý. Meniń aitaiyn degenim, sońǵy jyldary «Keleshegi joq aýyldar» degen halyqqa jaǵymsyz sheshim qabyldandy. Keibir derekterge súiensek, 1100 aýyl keleshegi joq degen jeleýmen ońtailanyp, iri aýyldarǵa, qalaǵa kóshirilip jatyr. Bul durys emes. Bizdiń qazaqtyń tamyry aýylda. Eki otbasy turatyn aýyl bolsa da, sol aýyldyń jaǵdaiy jasalýy kerek. Osy máseleni qolǵa alsaq pa dep otyrmyz. Aýyldy kórkeitpei, memlekettiń jaǵdaiy ońalady dep aitý qiyn. Aýylda turý úshin aýyl eńbekkerlerine tiianaqty jaǵdai jasalýy kerek. Bilim, mádeniet, sport syndy qai salany alsaq ta, qaladan kem turmaýy kerek», - dedi J. Dairabaev.
Memorandýmǵa qol qoiý rásiminde «Aýyl» partiiasynyń tóraǵasy Áli Bektaev «Qazaqstan fermerleri qaýymdastyǵynan» qabyldanǵan partiianyń jańa múshelerine partiialyq biletterdi tabys etti. «Qazaqstan fermerleri qaýymdastyǵynyń» basqarma tóraǵasy men orynbasarlary, atqarýshy direktory jáne aimaqtyq filialdarynyń tóraǵalary saltanatty rásimmen «Aýyl» partiiasynyń qataryna qabyldandy.
