Búgin Parlament Májilisiniń jalpy otyrysynda depýtat Juldyz Súleimenova mektepterge bilikti kadrlardy tartýǵa qatysty usynys aitty, dep habarlaidy "Ult aqparat".
«Nur Otan» partiiasynyń sailaýaldy baǵdarlamasynda 2025 jylǵa qarai barlyq mektepterdi muǵalimdermen 100 paiyz qamtamasyz etý qarastyrylǵan. Osy oraida, Memleket basshysy Qasym-Jomart Toqaevtyń tapsyrmasymen muǵalimderdiń eńbekaqysy júieli negizde edáýir artty. Sonymen birge, «Pedagog mártebesi týraly» zań – pedagog qyzmetiniń ózekti áleýmettik jáne kásibi máselelerin tiimdi sheshý maqsatynda der kezinde qabyldandy dep bilemiz. Bul quptarlyq jaǵdai. Biraq bizdiń depýtattyq saýalymyz sapaly pedagog kadrlarmen qamtamasyz etý arqyly mektepterdegi turaqty bilim sapasyn arttyrý máselesine arnalady. Kóptegen halyqaralyq zertteýler boiynsha bul másele pedagog kadrlardyń bilim deńgeiine tikelei bailanysty ekeni belgili», - dedi J. Súleimenova Bilim ministri Ashat Aimaǵambetovtiń atyna joldaǵan depýtattyq saýalynda.
Onyń aitýynsha, mektepterde sapaly kadrlardyń tapshylyǵy ata-analardyń daiyndyq ortalyqtarynda repetitorlardyń aqyly qyzmetine júginý májbúr etedi.
«Qazirgi pedagog mamandarynyń tapshylyǵy, ótpeli kezeńde mektepte jaqsy oqyǵan túlekterdiń pedagogikalyq mamandyqqa barmaýyna, al pedagogikalyq joǵary oqý oryndaryndaǵy stýdentterdiń aýyl mektepterine kelmeýine bailanysty. Osy turǵydan, aýyl mektepterin úzdik támamdaǵan túlekterdi pedagogika mamandyǵyna úgitteý jumystaryn júielendirip, jandandyrý qajet», - dedi depýtat.
Onyń sózine qaraǵanda, kóp jyldyq tájiribe kórsetkendei, pedagogikalyq ýniversitetter túlekteriniń kópshiliginde orta mektepterde pándik jáne ádistemelik bilim deńgeiiniń jetkiliksizdigi baiqalady. Osy rette, akademiialyq adaldyq qaǵidattaryna negizdelgen táýelsiz negizde pedagogikalyq joǵary oqý oryndary bitirýshi túlekteriniń pándik bilim deńgeiin tekserý tetikterin oilastyrý kerek.
«Pedagogikalyq joǵary oqý oryndarynda qazirgi zamandaǵy jańa innovatsiialyq pedagogikalyq tehnologiiany, ádis-tásilderdi stýdentterge tiimdi úiretý maqsatynda onlain negizde elimizdegi novator ustazdardyń avtorlyq kýrstaryn uiymdastyrýdy usynamyz», - dedi Juldyz Súleimenova.
