«Aýyl – el besigi» jobasynda turǵyndardy jumyspen qamtý boiynsha naqty jospar joq. Bul máseleni Májilistiń Ekonomikalyq reforma jáne óńirlik damý komitetiniń tóraǵasy Albert Raý kóterdi, dep habarlaidy QazAqparat.
«Aýyldardaǵy eń ózekti máselelerdiń biri – aýyl turǵyndaryn jumyspen qamtý jáne olardyń tabysyn arttyrý. 2020 jyldyń qorytyndysy boiynsha jalpy eldegi aýyldyq jerlerdegi jumyssyzdyq deńgeii 4,8% bolǵan. Aýylda jumyspen qamtylǵandar sany 3,6 mln adamdy qurady jáne 2019 jylmen salystyrǵanda 2,7%-ǵa tómendeý bar. Bul rette ózin-ózi jumyspen qamtyǵandar sany shamamen 1,2 mln adamdy nemese ekonomikalyq belsendi halyqtyń 34%-yn kórsetti. Aýylda ózin-ózi jumyspen qamtyǵan halyqty jáne jumyssyzdardy tartý boiynsha serpilis pen aiqyn josparlar joq», - dedi Raý Májiliste ótken «Úkimet saǵatynda».
Depýtat – «Aýyl – el besigi» jobasynda «Báiterek» holdingi arqyly agrarlyq biznesti qarjylandyrý, «Eńbek» jáne «Biznestiń jol kartasy – 2025» arqyly nátijeli jumyspen qamtýdy jáne jappai kásipkerlikti damytý sharalary jazylǵanyn atap ótti.
«Bul tapsyrma qansha oryndalady álde bul jai ǵana deklaratsiia ma? Bul óte mańyzdy suraq. Qalaǵa qaraǵanda jumyssyzdyq deńgeii edáýir joǵary aýyl jastaryna basa nazar aýdarǵan jón. Sondyqtan qazir aýyl jastary kóbine jaqsy ómir izdep qalaǵa ketedi. Olardyń kásibi bilim deńgeii jetkiliksiz jáne jaqsy jumysqa ornalasa almaidy. Degenmen dál osyndai jastardyń aýylda turyp, jumys istep, jaqsy tabys tapqan mysaldary da bar. Eńbek jáne halyqty áleýmettik qorǵaý ministrligi oblys ákimdikterimen birlesip, aýyldyq eldi mekenderde kásipkerlikti damytý jáne halyq tabysynyń ósýi jónindegi ulttyq jobanyń oryndalýyn qamtamasyz etýi qajet», - dedi ol.
Mysal retinde depýtat «Jambyl oblysy halqynyń tabysyn arttyrý» pilottyq jobasyn eske saldy.
«Memlekettik organdardyń habarlaýynsha, munda oń dinamika bar: 2019 jylmen salystyrǵanda ataýly áleýmettik kómek alýshylar sany úsh esege azaiǵan, jobaǵa qatysýshylardyń ortasha tabysy 2,5 esege artqan, esh nátijesiz ózin-ózi jumyspen qamtyǵandar sany azaiǵan. Árine, múmkindik bolsa, osy tájiribeni elimizdiń basqa óńirlerinde de taratý qajet», - dedi Albert Raý.
Aita keteiik, Májilistegi Úkimet saǵatynda «Aýyl — El besigi» jobasy talqylanyp jatyr. Qazaqstannyń aýyldaryndaǵy 6 293 eldi mekende 7,8 mln adam turady.
2019 jyly elimizde «Aýyl – El besigi» baǵdarlamasy iske asyryla bastady. Onyń basty maqsaty — aýyldaǵy adamdardyń ómirin jaqsartý. Jol qurylysy, sýmen qamtamasyz etý, densaýlyq saqtaý, bilim berý, mádeniet, sport nysandaryn qaita jańartý jáne jańa nysandar salý, jumys oryndaryn qurý — osynyń barlyǵy atalǵan baǵdarlamany iske asyrýdy kózdeidi.
