Arnaiy tekserý barysynda aýyldyq okrýg ákimderine úmitkerler arasynda jalǵan diplomy bar 17 adam jáne sottylyǵy bar 4 adam anyqtaldy. Bul týraly «Habar 24» telearnasyna bergen suhbatynda Qazaqstan Respýblikasy Prezidenti Ákimshiligi Basshysynyń orynbasary Málik Myrzalin málimdedi, dep jazady QazAqparat.
«Bir jaǵynan, arnaiy tekserýdi ótkizý talaby zańmen bekitilgen. Bul barlyq memlekettik qyzmetshilerge mindetti, sondyqtan aýyldyq okrýg ákimderi de odan tys qalmaidy. Bul – bir jaǵynan. Ekinshi jaǵynan, men bul suraqty mamandar jii qoiatynyn bilemin. Men sizge jaýap bereiin. Men arnaiy suradym. Aýyldyq deńgeidegi ákimdikke úmitkerlerdi arnaiy tekserý nátijeleri boiynsha jalǵan diplomy bar 17 adam jáne buryn jaýapqa tartylǵan 4 adam anyqtaldy. Árine, olarǵa sailaýǵa qatysýǵa tyiym salyndy. Iaǵni gipotetikalyq túrde, bul protsedýra bolmaǵan jaǵdaida, halyq jalǵan diplomy bar nemese buryn sottalǵan adamdy ákimdikke taǵaiyndaýy múmkin edi. Osyndai ákimderdiń el basqarǵanyn qalaisyz ba? Men de qalamas edim», – dedi M. Mýrzalin «Habar 24» jýrnalisiniń aýyldyq okrýg ákimdigine úmitkerlerdi arnaiy tekserý qajettiligi týraly suraǵyna.
Jalpy, Prezident Ákimshiligi Basshysynyń orynbasarynyń pikirinshe, aýyl ákimderin tikelei sailaý basqarý sapasyna áser etýi kerek. Óitkeni álemdik tájiribe kórsetip otyrǵandai, tikelei sailaýda basshy sailaýshylar aldyndaǵy jaýapkershilikti sezinedi. Bul onyń jumysynyń nátijesine oń áser etetini sózsiz. Sonymen qatar zańnamada turǵyndardyń ne jergilikti qoǵamdastyq jinalysy arqyly, ne aýdandyq máslihat arqyly ákimniń ókilettigin toqtatý týraly bastama kóterýge quqyǵy bar ekendigi kórsetilgen. Demek, ákim tek sailanyp qana qoimai, ony sailaǵan adamdardyń baqylaýynda bolady. Esep berý men ashyqtyq basqarý sapasyn joǵarylatady, sondyqtan ákim óz jumysynyń nátijesine kóp kóńil bóletin bolady.
Qorytyndylai kele, M.Myrzalin Memleket basshysynyń bilikti odan ári ortalyqsyzdandyrý jáne odan ári demokratiialandyrý, olarǵa qatysty máselelerdi sheshýde azamattardyń rólin arttyrý mindetterin qoiǵanyn eske túsirdi. Aýyl ákimderin sailaý – osy protses elementteriniń biri ǵana.
