QR Ortalyq sailaý komissiiasynyń múshesi Erlan Daýylbaev aýyl ákimine tirkelý qalai júrgiziletindigin aitty, dep habarlaidy QazAqparat.
«Aýdandyq mańyzy bar qala, aýyl, kent, aýyldyq okrýg ákimine kandidat ózin-ózi usynǵan jaǵdaida, daýys berýge quqyǵy bar tiisti sailaý okrýgi sailaýshylarynyń jalpy sanynyń keminde 1 paiyz daýysynyń qoldaýyna ie bolýy tiis. Sailaýshylardy qoldaý olardyń qoldaryn jinaýmen kýálandyrylady. Kandidattardy qoldap qol jinaýdy senim bildirgen adamdar uiymdastyrady jáne ol úshin kandidat osy Konstitýtsiialyq zańda, «Qazaqstan Respýblikasyndaǵy jergilikti memlekettik basqarý jáne ózin-ózi basqarý týraly» Zańynyń 36-babynda, memlekettik qyzmet salasyndaǵy zańnamada kózdelgen talaptarǵa sáikestigi tekserilgennen keiin 3 kúnnen keshiktirilmei tiisinshe aýdandyq sailaý komissiiasy beretin qol qoiý paraqtarymen rásimdeledi. Toltyrylǵan qol qoiý paraqtary tiisinshe aýdandyq sailaý komissiiasyna tapsyrylady. Ol 3 kún merzimde ishki ister qyzmetkerlerin tarta otyryp, jinalǵan qoldardyń rastyǵyn tekseredi jáne tiisti hattamany rásimdeidi. Qoldardyń rastyǵyn tekserý Konstitýtsiialyq zańǵa sáikes aýdandyq mańyzy bar qala, aýyl, kent, aýyldyq okrýg ákimine kandidatqa qajetti anyq qoldar anyqtalǵanǵa deiin júrgiziledi»,- dedi komissiia múshesi OSK otyrysy barysynda.
Onyń aitýynsha, kandidat tirkelý úshin saiasi partiialar usynǵan kezde azamattyń kandidat bolýǵa kelisimi, ómirbaiandyq derekteri, kandidat pen jubaiynyń aktivteri men mindettemeleri týraly deklaratsiiany tapsyrǵany týraly memlekettik kiris organynan anyqtamasy, QR memlekettik qyzmetine kiretin azamatty arnaiy tekserý úshin qajetti qujattardy, saiasi partiianyń sailaý jarnasyn engizgendigin kýálandyratyn qujat, kandidattyń saiasi partiiaǵa músheligin rastaityn qujat usynýy qajet.
Al ózin ózin usynǵan adam kandidat bolyp daýysqa túsý týraly ótinishi, ómirbaiandyq derekter, kandidat pen jubaiynyń aktivteri men mindettemeleri týraly deklaratsiiany tapsyrǵany týraly memlekettik kiris organynan anyqtamasy, QR memlekettik qyzmetine kiretin azamatty arnaiy tekserý úshin qajetti qujattardy, sailaý jarnasyn engizeni týraly qujat usynýy tiis.
Sonymen qatar sailaý okrýgi sailaýshylarynyń jalpy sanynyń keminde 1 paiyz daýysynyń qoldaýyna ie bolǵandyǵyn rastaityn aýmaqtyq sailaý komissiiasynyń anyqtamasyn da usynýy kerek.
Al aýdan ákimi kandidatty usynǵan kezde joǵaryda atalǵan qujattarmen qatar arnaýly usynysy qosa berilýi tiis.
«Kandidattardy tirkeý barlyq qajetti qujattardy alǵannan keiin bastalady jáne sailaý kúninen 10 kún buryn jergilikti ýaqytpen saǵat 18.00-de aiaqtalady», - dedi Erlan Daýylbaev.
