Aýyl ákimderiniń sailaýyna jasy 25-ke tolǵan azamattar qatysa alady. Bul týraly Senat apparat basshysynyń orynbasary Maksim Spotkai jelidegi paraqshasynda jazdy.
«Senat aýyl ákimderin sailaý týraly zań qabyldady. Budan bylai aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimderi tikelei sailaýda sailanatyn bolady. Sailaýǵa jasy 25-ke tolǵan azamattar qatysa alady. Kandidattardy saiasi partiialar men aýdan ákimderi usynady. Sondai-aq, azamattar ózin ózi usynyp, sailaýǵa kandidat retinde qatysýǵa múmkindigi bar. Ol úshin sol aýyl turǵyndarynyń kem degende 1 paiyzynyń qolyn jinaý qajet.
Byltyr Ulttyq keńes-tiń saiasi reformalar jónindegi toby osy taqyrypqa qatysty birneshe usynys aitty. Sonyń biri – aýyl ákimderin tikelei jasyryn daýys berý arqyly sailaý jáne kez kelgen azamattyń sailaný quqyǵyn shektemeý. Sol joly aýyl ákimine úmitkerlerge qoiylatyn talap ta jeńildeý bolsyn degen tilegimizdi aitqan edik», - dep jazdy Maksim Spotkai jelidegi paraqshasynda.
Onyń habarlaýynsha Senatta qabyldanǵan zańnyń mańyzy óte zor.
«Prezidentimiz aitqandai, aýyl ákimderin sailaýdy júzege asyramyz dep asyǵystyq, naýqanshyldyq tanytpaý kerek. Qazaqstannyń saiasi tranformatsiiasy bir sáttik, popýlistik aktsiia emes. Bul reforma maǵynasy jaǵynan strategiialyq sipatqa ie.
Sonymen qatar búgin senatorlar Memleket basshysynyń bastamasymen qolǵa alynǵan saiasi reformalardy iske asyrý aiasynda sailaý týraly zańnamalarǵa birqatar túzetýler engizdi. Onyń ishinde - saiasi partiialardyń Májilis pen máslihattarǵa ótý shegin 7-den 5 paiyzǵa deiin tómendetý jáne daýys berý biýlletenderine «Bárine qarsymyn» degen baǵan engizý.
Bul zańdar Prezidentimiz bastaǵan saiasi reformalardy iske asyrý jolyndaǵy kelesi nyq qadam dep aitýǵa bolady. Al bul reformalardyń túpki maqsaty – eldi demokratizatsiialaý protsesin jalǵastyrý jáne barlyq qazaqstandyqtardyń ál-aýqatyn arttyrý dep qabyldaǵan jón», - dep tolyqtyrdy ol.
