«Partiialyq emes baiqaý ortalyǵy» aldaǵy aýyl ákimderin sailaýdy baqylaýǵa qatysady. Bul týraly uiym tóraǵasy Tólegen Kúnádilov aityp berdi, dep habarlaidy QazAqparat.
«Partiialyq emes baiqaý ortalyǵynyń» qyzmeti sailaýǵa, onyń ishinde sailaý ýchaskelerinde baqylaý men monitoring júrgizýge baǵyttalǵan. Qazirgi ýaqytta uiymnyń barlyq oblystarda filialdary bar jáne uiym memlekettik deńgeidegi sailaý kezeńinde saiasi, ekonomikalyq, áleýmettik jáne mádeni quqyqtar men bostandyqtardy iske asyrýǵa jáne qorǵaýǵa nietti.
Tólegen Kúnádilovtyń aitýynsha, uiym aldaǵy aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderiniń sailaýyna belsene qatysady.
«Sailaýdy baiqaýda tájiribesi bar azamattar birigip, «Partiialyq emes baiqaý ortalyǵy» respýblikalyq qoǵamdyq birlestigin qurýdy uiǵardy. Bizdiń maqsatymyz – qatań saiasi beitaraptyq tanytý. Eshqandai partiia ókiline, esh úmitkerge basymdyq bermeidi. Olar sailaý komissiiasynyń jumysyna kedergi jasamai, zań sheńberinde ótýine yqpal tigizedi, buzýshylyqtardy baqylaý, tirkeý jáne ádil sailaý ótkizýge kómektesedi», - dep atap ótti T. Kúnádilov.
Buǵan deiin partiialyq emes baqylaý ortalyǵy Azamattyq alians pen Kásipodaqtar federatsiiasynan birikken jariialanbaǵan organ bolatyn. Endi bul ortalyqty jeke zańdy tulǵa retinde tirkeý uiǵaryldy, ol baqylaýshy retinde sailaý protsesin maqsatty túrde qadaǵalai bastaidy.
«Biz ózimizdiń is-áreket algoritmimizdi, ar-namys kodeksin ázirlep jatyrmyz. Baqylaýshylar qandai da bir kandidatqa nemese saiasi partiiaǵa beitarap bolýǵa jáne sailaý protsesiniń ótýine kedergi keltirmeýge tiis», - deidi spiker.
Sonymen birge, sailaý protsesin baqylaý eki kezeńnen turady: uzaq merzimdi jáne qysqa merzimdi. Uzaq merzimdi kezeńde sailaýǵa deiingi baqylaý: kandidattarǵa teń múmkindikter berile me, buzýshylyqtar joq pa, múgedektigi bar adamdarǵa kandidatqa daýys berý múmkindigi bar ma degen suraqtar qaralady. Al qysqa merzimdi kezeńde sailaý kúni tańerteńnen keshke deiin baqylaýshylar protsesti tolyǵymen baqylaidy.
Eske sala keteiik, 25 shildede bir mezgilde 700-den astam aýyl ákimderin sailaýy ótedi. Aýdandyq mańyzy bar qalalardyń, aýyldardyń, kentterdiń, aýyldyq okrýgterdiń qalǵan ákimderin sailaý olardyń ókilettik merzimi aiaqtalǵan soń ótkiziledi.
