Aýstriiada koronavirýs juqtyrǵandar sanynyń artýyna bailanysty 17 qarasha men 6 jeltoqsan aralyǵynda karantin erejesi engiziledi. Bul týraly dw.com portaly habarlady.
Aýstriia úkimeti koronavirýsqa shaldyqqandar sany artqandyqtan, pandemiia bastalǵaly ekinshi ret erekshe qatań karantin tártibin (lokdaýn) engizip jatyr. Bul týraly senbi, 14 qarashada Venadaǵy baspasóz konferentsiiasynda kantsler Sebastian Kýrts habarlady.
17 qarasha, seisenbiden bastap 6 jeltoqsanǵa deiin elde mektepter, turmystyq qyzmet kórsetý mekemeleri jabyq bolady. Tek asa qajettilik bolǵan jaǵdaida úiden shyǵýǵa ruqsat etiledi. Oǵan jumysqa barý, týystaryna kómek kórsetý nemese taza aýada demalý jatady. Degenmen, erejelerdi parlament ár on kún saiyn qaita qarap otyrady.
Dárihana, bank, adamdarǵa kúndelikti qajet taýarlardy satatyn dúkender, sýpermarketter jumysyn jalǵastyrady. Balabaqshalar jabylyp, mektepter qashyqtan oqýǵa kóshedi. Kei jaǵdailarda ǵana ata-analar balasyn bul mekemelerge ákele alady.
«Eshkim qaita lokdaýndy engizýdi qalamaitynyn bilemiz, biraq bul pandemiiamen kúreste tiimdiligi joǵary jalǵyz tásil», - dep atap ótti Kýrts.
Aýstriiadaǵy meiramhanalar, týristik biznespen ainalysatyn kompaniialar, sondai-aq mádeni jáne saýyqtyq mekemeler 3 qarashadan bastap jabylǵan bolatyn. Oǵan qosa elde 20.00-6.00 aralaǵynda kommendanttyq saǵat engizildi.
Djon Hopkins ýniversitetiniń málimetinshe, pandemiia bastalǵaly Aýstriiada 191 228 adam koronavirýs juqtyrdy. 1661 naýqas kóz jumdy. Qarashadan bastap elde jańa juqtyrý oqiǵalary kóbeiip, sarapshylar densaýlyq saqtaý júiesi, onyń ishinde qarqyndy terapiia salasyna aýyrlyq túsetininen qaýiptene bastady.
Aýstriiada alǵashqy lokdaýn naýryzdyń ortasynda engizilip, 2020 jyldyń 12 sáýirinen bastap jeńildetile bastaǵan bolatyn.
