Qazaqstandyq Zarina Diias Aýstraliia ashyq chempionatynyń úshinshi ainalymyna shyqty, dep habarlaidy "Ult aqparat".
Dúniejúzilik reitingte 83-orynda turǵan Z.Diias ekinshi ainalymda álemniń 66-raketkasy, amerikalyq, túbi horvatiialyq Bernarda Peramen kezdesti.
Ótken jyly AQSh ashyq chempionatynda qazaqstandyq tennisshi qarsylasynan 6:7 (4:7), 0:6 esebimen utylyp qalǵan bolatyn.
Birinshi partiia barysynda Z.Diias áldeneshe ret breik-pointtaryn paidalana almady. Degenmen toǵyzynshy geimde degenine jetti – 5:4. Sosyn setke dop bergende, esesin jibergen joq – 6:4.
Ekinshi sette amerikalyq tennisshi breikpen alǵa shyqty – 2:0. Aqyry ol osy basymdylyǵyn saqtap qaldy – 6:3. Bul partiiada da Zarinanyń alty birdei breik-pointy boldy.
Úshinshi, sheshýshi sette de B.Pera breik jasai aldy – 2:1. Degenmen altynshy geimde Z.Diias tarazy basyn teńestirdi – 3:3. Sodan keiin taǵy bir breikpen esepti 5:3-ke jetkizdi. Sosyn matchbolyn múlt jibergen joq – 6:3.
Tartysty ótken báseke 2 saǵat 4 minýtqa sozyldy.
Osylaisha Zarina 2020 jyly ketken esesin qaitardy.
Z.Diias úshinshi ainalymda álemniń 14-raketkasy, «Úlken dýlyǵa» týrniriniń eki dúrkin jeńimpazy, ispaniialyq Garbine Mýgýrýsa nemese reitingte 130-satydaǵy reseilik Liýdmila Samsonovanyń bireýimen kortqa shyǵady.
